ރައީސް ޑރ. މުހައްމަދު މުއިއްޒުގެ ދަރިކަނބަލުން ޔާސްމީން މުހައްމަދު މުއިއްޒާ ގުޅުވައި ސޯޝަލް މީޑިއާގެ މަންސަތަކުގައި ދައުރު ކުރަމުން ދަނީ ފޭކް ސްކްރީންޝޮޓެއް ކަމަށް، ރައީސް މުޢިއްޒު އާއިލާގެ ގާނޫނީ ވަކީލް، ކުރީގެ ބަންޑާރަނައިބު އައިޝަތު އާޒިމާ ޝަކޫރު މިއަދު ވިދާޅުވެއްޖެ އެވެ.

އާޒިމާ ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، ޒުވާނުންގެ މުޒާހަރާ އިން ރޭގައި ހައްޔަރުކުރި އަންހެނަކާ ގުޅޭގޮތުން ޔާސްމީންގެ އިންސްޓަގްރާމްގައި ކުރެއްވި ޕޯސްޓެއް ކަމަށް ބުނެ ދައުރުކުރަމުން ދަނީ ފޭކް ސްކްރީންޝޮޓެއް ކަމަށެވެ.

Ad by Hajj Corporation

އެހެންކަމުން ރައީސް މުއިއްޒުގެ އާއިލާއިން ވަނީ ޔާސްމީނާ ގުޅޭގޮތުން ދޮގު މައުލޫމާތު ފަތުރައި އާއްމުންނަށް އޮޅުވާލަން ކުރަމުންދާ މަސައްކަތް ހުއްޓާލުމަށް ގޮވާލައްވައިފަ އެވެ.

މީގެ ކުރިން ވެސް، ރައީސްގެ ދަރިކަލުން އުމެއިރު މުހައްމަދު މުއިއްޒުއާ ގުޅޭގޮތުން އިދިކޮޅު އެމްޑީޕީން ބޭއްވި މުޒާހަރާއެއްގައި އެ ޕާޓީގެ އިސް އެކްޓިވިސްޓް މަރިޔަމް ޒުބެއިރު (މަންދީ) ވަނީ ދޮގު ބުހުތާން ވާހަކަ ދައްކާފައެވެ. އޭނާ ދެއްކި ވާހަކައަކާ ގުޅިގެން ރައީސްގެ އާއިލާއިން ވަނީ އަބުރުގެ ދައުވާ ވެސް ކޮށްފަ އެވެ.

ހަމައެއާއެކު، ކުޑަކުދިންގެ ހައްގުތައް ރައްކާތެރި ކުރުމުގެ ގާނޫނާއި ބައިނަލްއަގްވާމީ މުއާހަދާތަކުން ކުޑަކުދިންނަށް ލިބިދޭ ރައްކާތެރިކަން ނިގުޅައިގެންފައިވާ ކަމަށް ބުނެ ފެމިލީ ކޯޓަށް ވެސް މައްސަލަ ހުށަހަޅާފައިވެ އެވެ.