ބަނޑުހައިހޫނުކަމުގެ ސަބަބުން ޣައްޒާއިން މިހާތަނަށް 57 މީހުން މަރުވެއްޖެއެވެ.

ޔަހޫދީން ޣައްޒާ ހިސާރުކޮށްފައިވާއިރު ކާބޯތަކެއްޗާއި، ފެނާއި، ބޭސްފަރުވާގެ ސާމާނު ވެއްދުމަށް ހުރަސް އަޅަނީ ހަމާސް ބަލިކޮށްލުމަށްކަމަށެވެ.

މުޅި ޣައްޒާއަށް ހައިހޫނުކަން ފެތުރިފައިވާއިރު މި ހައިހޫނުކަމުގެ ސަބަބުން މިހާތަނަށް 57 މީހަކު ވަނީ މަރުވެފައެވެ. އެމީހުންގެ ތެރޭގައި ގިނައީ ކުޑަކުދިންކަމަށް ބައިނަލްއަގްވާމީ މީޑިއާތަކުން ރިޕޯޓުކުރެއެވެ. އެއާއެކުވެސް ރެއިން ފެށިގެން ދެމުންދާ ހަމަލާތަކުގައި ގިނަ އަދަދަެއްގެ ކުޑަކުދިންނާއެކު 45 މީހަކު ވަނީ ޝަހީދުކޮށްލާފައެވެ.ހަނގުރާމައިގެ ހަތިޔާރެއްގެ ގޮތުގައި ބަނޑުހައިހޫނުކަން ބޭނުންކުރާތީ ޔަހޫދީންނަށް ބައިނަލްއަޤްވާމީ ފާޑުކިޔުންތައް އިތުރުވަމުންދާއިރު، އދ.ގެ އިސް ފަރާތްތަކާއި އިންސާނީ ޙައްޤުތަކަށް މަސައްކަތްކުރާ ފަރާތްތަކުން އަންނަނީ އިންސާނީ އެހީ ވެއްދުމަށް ހުރަސް ނޭޅުމަށް ތަކުރާރުކޮށް ޔަހޫދީންނަށް ގޮވާލަމުންނެވެ.

މިއަދު ހެނދުނު ޣައްޒާގެ ދެކުނުގެ ރަފާހްގައި ހަމާސް އިން ހިންގި އޮޕަރޭޝަނެއްގައި ޔަހޫދީ ދެ ސިފައިން މަރާލައި ދެ މީހަކު ޒަހަމްކޮށްލާފައިވާކަމަށް ޔަހޫދީ އަސްކަރިއްޔާއިން ވަނީ ބުނެފައެވެ. މީގެ އިތުރުން ޔަމަނުން އިސްރާއީލަށް އަމާޒުކުރި ހަމަލާއެއްގެ ސަބަބުން އިސްރާއީލުގެ މައި އެއާޕޯޓުގެ ދަތުރުތައްވަނީ މެދުކަނޑާލަންޖެހިފައެވެ.

އިސްރާއީލުން ފަލަސްތީނުގެ ބިމުގައި ހިންގާ ގަތުލުއާއްމުގައި މިހާތަނަށް 52,495 ފަލަސްތީނު ރައްޔިތުން ޝަހީދުކޮށްލައި 118,366 މީހުން ވަނީ ޒަހަމްކޮށްލާފައެވެ.