'' ޢަދަދު'' ނޫހުން އިއްޔެ ޝާއިޢުކޮށްފައިވާ ލިޔުމެއްގައި ޖަމްޢިއްޔަތުއްސަލަފާ މެދު ބުހުތާނު ދޮގު ހަދާފައިވާތީ، އެކަން ސާބިތުކޮށްދިނުމަށް އެދި އެ ނޫހަށް މިއަދު ސިޓީއެއް ފޮނުވާފައިވާކަމަށް އެ ޖަމިއްޔާއިން މިއަދު ބުނެފިއެވެ.

ޖަމްޢިއްޔަތުއްސަލަފްގެ ރައީސް ސޮއިކުރައްވައި ފޮނުވާފައިވާ މި ސިޓީގައި، "ޑރ. މުޢިއްޒު އެވެ. ފުދިއްޖެއެވެ. އިސްތިއުފާދޭށެވެ." މި މައުޟޫޢުގައި ޢަދަދު ނޫހުން ޝާއިޢުކޮށްފައިވާ އާޓިކަލްގައި "ސުޕްރީމް ކޯޓުގެ ގޮނޑިއެއް ހުސްވުމުން އެ ގޮނޑިއަށް އައިސްދިނުމަށް މުއިއްޒު ގުޅި ސަލަފު ޖަމްއިއްޔާގެ މެންބަރުން ވެސް ދުނިޔޭގައި އެބަތިއްބެވެ." މިއީ އެއްވެސް ޒިންމާދާރުކަމެއްނެތި، ކަނޑައެޅިގެން ޙަޤީޤަތާ ޚިލާފަށް ޝާއިޢުކޮށްފައިވާ ބޮޑު ދޮގެއްކަމަށް ބަޔާންކޮށްފައިވެއެވެ.

ސިޓީގައި އިތުރަށް ބަޔާންކޮށްފައިވަނީ މިފަދަ ބޮޑު ބުހުތާނެއް ހަދާފައިވާތީ، އެކަމަށް ޖަމްޢިއްޔާގެ މެންބަރުންގެ ގާތުން މާފަށް އެދުމާއެކު އެކަން އެ ނޫހުގައި ހާމަކޮށްދިނުމަށެވެ. އަދި އެހެން ނުވާނަމަ، ޚަބަރުގައި ބަޔާންކޮށްފައިވާ މެންބަރުންގެ ނަންތައް ހާމަކޮށްދެއްވައި، މަޞްދަރާއި އެ ވާހަކައިގެ ތެދުކަމުގެ ހެކި ދެއްކެވުމަށްވެސް އެދިފައިވެއެވެ.

ޖަމްޢިއްޔަތުއްސަލަފްއިން ވިދާޅުވީދާޅުވީ، މި މައްސަލައިގައި ހެކި ނުދައްކަވައިފިނަމަ، އެއީ ރައްޔިތުންގެ އިތުބާރު ލިބިފައިވާ ޖަމްޢިއްޔާގެ އަގުވައްޓާލައި ބަދުނާމު ކުރުމަށް ކުރާ މަސައްކަތެއްގެ ގޮތުގައި ދެކޭނެ ކަމަށެވެ. އަދި މިކަމުން ލިބޭ މަޢުނަވީ ގެއްލުމުގެ ބަދަލު ހޯދުމަށްޓަކައި ކަމާބެހޭ ފަރާތްތަކަށް ހުށައަޅާނެކަމަށްވެސް ބުނެފައިވެއެވެ.

ޖަމްޢިއްޔަތުއްސަލަފްއިން މި ސިޓީގެ ކޮޕީއެއް މީޑިއާ ކައުންސިލަށްވެސް އީމެއިލްގެ ޒަރީޢާއިން ވަނީ ފޮނުވާފައެވެ.