ހިލޭ ޑިގްރީ ޕްރޮގްރާމުގެ ދަށުން މި އަހަރުގެ މިހާތަނަށް 8327 ދަރިވަރުން ކިޔަވަމުންދާއިރު، އެޕްރީލް މަހުގެ ނިޔަލަށް 51.7 މިލިއަން ރުފިޔާ ޚަރަދުކޮށްފައިވާ ކަމަށް މަތީ ތައުލީމާ ބެހޭ ވުޒާރާއިން ބުނެފިއެވެ.

އެ ވުޒާރާއިން އާންމު ކުރި ތަފާސް ހިސާބުތަކުން ދައްކާ ގޮތުގައި، ހިލޭ ޑިގްރީ ޕްރޮގްރާމުގައި ކިޔަވަމުންދާ އަންހެން ދަރިވަރުންގެ އަދަދު ބޮޑުތަނުން އިތުރެވެ. އެޕްރީލް މަހުގެ ނިޔަލަށް އަދާހަމަކުރި މައުލޫމާތު ތަކަށް ބަލާއިރު، ހިލޭ ޑިގްރީއަށް ކިޔަވަމުން ދަނީ 5258 އަންހެން ދަރިވަރުންނާއި 3069 ފިރިހެން ދަރިވަރުންނެވެ. މި އަދަދުތަކަށް ބަލާއިރު ފިރިހެން ދަރިވަރުންނާ އަޅާބަލާއިރު 2189 އަންހެން ދަރިވަރުން ގިނައެވެ.

ހިލޭ ޑިގްރީ ޕްރޮގްރާމުގެ ދަށުން ކިޔަވާ ދަރިވަރުން އިތުރުވަމުން އަންނައިރު، ސަރުކާރުގެ ލޯން އެހީގައި ރާއްޖެއިން ބޭރުގައި ވެސް ގިނަ އަދަދެއްގެ ދަރިވަރުން އަންނަނީ ކިޔަވަމުންނެވެ.

މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާއި ބެހޭ ވުޒާރާގެ ފުރަތަމަ ޑިގްރީ ސްކީމް އަދި ސްކޮލަރޝިޕް ސްކީމްތަކުގެ ދަށުން ޖުމްލަ 9،044 ދަރިވަރުން ދަނީ މި ވަގުތު މަތީ ތަޢުލީމު ހާޞިލުކުރަމުންނެވެ.

ސްކޮލަޝިޕް ސްކީމްތަކުގެ ދަށުން ޖުމްލަ 717 ދަރިވަރުންނަށް މަތީ ތަޢުލީމާއި ތަމްރީނު ހާޞިލުކުރުމުގެ ފުރުޞަތު ދެވިފައިވާއިރު، މި އަހަރު މިހާތަނަށް ސްކޮލަޝިޕްގެ ދަށުން ކިޔެވުން ފަށާފައިވަނީ 25 އަންހެން ދަރިވަރުންނާއި 9 ފިރިހެން ދަރިވަރުންނެވެ. އަދި މި އަހަރު މި ސްކީމްގެ ދަށުން މިހާތަނަށް ޖުމްލަ 55.5 މިލިއަން ރުފިޔާ ވަނީ ދަރިވަރުންނަށް ދޫކުރެވިފައެވެ.