ޗައިނާއިން ހިލޭ ޕީއެޗްޑީއާއި މާސްޓަރސްއަށް ކިޔެވުމުގެ 39 ސްކޮލަރޝިޕަށް މަތީ ތަޢުލީމާ ބެހޭ ވުޒާރާއިން އިއްޔެ ހުޅުވާލައިފިއެވެ.

އެ މިނިސްޓްރީން ހުޅުވާލީ، ޗައިނާގައި ކިޔަވަން ޕީޗްއެޗްޑީގެ 14 ފުރުޞަތު، މާސްޓަރސްއަށް ކިޔަވަން 25 ފުރުޞަތަށެވެ. މި ސްކޮލަރޝިޕަށް ކުރިމަތިލާން ހުޅުވާލީ އިއްޔެއެވެ. މުއްދަތު ހަމަވަނީ އަންނަ ބުރާސް ފަތި ދުވަހުގެ 2:00 އަށެވެ.

ޗައިނާގެ މިނިސްޓްރީ އޮފް ކޮމާސްއިން ދޭ މި ސްކޮލަރޝިޕްގެ ދަށުން ކިޔަވަން ޓިއުޝަން ފީއާއި އޮންކެމްޕަސް އެކޮމޮޑޭޝަނާއި ސްޓައިޕެންޑާއި ރިސެޓެލްމަންޓް ފީއާއި މެޑިކަލް އިންޝުރެންސާއި އަދި ދެކޮޅު ޓިކެޓް ހަމަޖައްސައިދެއެވެ.

މި ސްކޮލަރޝިޕްގެ ދަށުން ކިޔަވަން ހުޅުވާލާފައިވާ ކޯސްތަކުގެ ތެރޭގައި ޕަބްލިކް ޕޮލިސީ އެނަލައިސިސްއާއި އިކޮނޮމިކްސް ފޯރ ޕަބްލިކް ޕޮލިސީއާއި ރިސަރޗް ޑިޒައިން އެންޑް ޕްރެކްޓިސްއާއި ރިސަރޗް ޑިޒައިން އެންޑް ޕްރެކްޓިސްއާއި އިނޮވޭޝަން އެންޑް އިކޮނޮމިކްސް ޑިވެލޮޕްމަންޓް ސްޓްރެޓަޖީއާއި ޗައިނާސް ބަސް ހިމެނެއެވެ.

މަތީ ތަޢުލީމާ ބެހޭ ވުޒާރާއިން ކުރި އިއުލާނުގައި ބުނެފައިވާ ގޮތުން މާސްޓަރސް ޑިގްރީއަށް ހުށައަޅާ ފަރާތްތަކުން ހުށައަޅާ ކޯހާ ގުޅޭ ދާއިރާއިން ބެޗްލާސް ޑިގްރީ ނިންމާފައިވާ ފަރާތްތަކަށް ވާންޖެހެއެވެ. އަދި އެޕްލައި ކުރާ ކޯހާއި ގުޅޭ ދާއިރާއެއްގައިމަދުވެގެން 3 އަހަރު ދުވަހުގެ މަސައްކަތުގެ ތަޖްރިބާ ލިބިފައިވުމާއި ޕަބްލިކް ސެކްޓަރ ގައި މަސައްކަތް ކުރާ ފަރާތެއް ކަމުގައިވުމުގެ އިތުރުން މި އަހަރުގެ ސެޕްޓެމްބަރުގެ ނިޔަލަށް 45 އަހަރު ފުރިފައި ނުވާ ފަރާތަކަށް ވާންޖެހެއެވެ.

ޕީއެޗްޑީއަށް ހުށައަޅާ ފަރާތްތަކުން ހުށަހަޅާ ކޯހާއި ގުޅޭ ދާއިރާއަކުން މާސްޓަރސް ޑިގްރީ ހާސިލުކޮށްފައިވުމާއި އަދި އެޕްލައި ކުރާ ކޯހާއި ގުޅޭ ދާއިރާއެއްގައިމަދުވެގެން 3 އަހަރު ދުވަހުގެ މަސައްކަތުގެ ތަޖްރިބާ ލިބިފައިވުމާއި ޕަބްލިކް ސެކްޓަރ ގައި މަސައްކަތް ކުރާ ފަރާތެއް ކަމުގައިވުމުގެ އިތުރުން މި އަހަރުގެ ސެޕްޓެމްބަރުގެ ނިޔަލަށް 45 އަހަރު ފުރިފައި ނުވާ ފަރާތަކަށް ވާންޖެހެއެވެ.