އއ. މަތިވެރި ކައުންސިލުން އިންތިޒާމުކޮށްގެން ކޮންމެ އަހަރަކު ވެސް ބާއްވަމުން އަންނަ “މަގޭ ވެށި - ޗާލު މަތިވެރި” ސާފުކުރުމުގެ ޙަރަކާތް ފަށައިފިއެވެ.

މިއީ އީދާއި ގުޅުވައިގެން މުޅިރަށް ސާފުކުުރުމަށް ހިންގާ ބޮޑު އިޖުތިމާއީ މަޝްރޫއެއް ކަމަށް މަތިވެރި ކައުންސިލްގެ ރައީސް އަހްމަދު އަސްލަމް ވިދާޅުވިއެވެ.

Ad by Hajj Corporation

މިއަދު ހެނދުނު މަތިވެރީގައި އޮތް މި ރަސްމިއްޔާތު ފައްޓަވާދެއްވީ މިނިސްޓްރީ އޮފް ސިޓީސް ލޯކަލް ގަވަރމަންޓް އެންޑް ޕަބްލިކް ވާރކްސްގެ ޑެޕިއުޓީ މިނިސްޓަރ ޢިނާޒު ޢަލީ އެވެ. އެރަސްމިއްޔާތުގައި ޑެޕިއުޓީ މިނިސްޓަރ ޢިނާޒު ޢަލީ ދެއްކެވި ވާހަކަފުޅުގައި މި ހަރަކާތް ޝަރަފުވެރިކުރުމުގެ ފުރުޞަތު މިނިސްޓަރީއަށް ދެއްވީތީ ކައުންސިލާ ޑަބުލިއޫ. ޑީ. ސީ އަދި ރަށުގެ ރައްޔިތުންނަށް މިނިސްޓަރ އާދަމް ޝަރީފު ޢުމަރުގެ ނަންފުޅުގައި ޝުކުރު އަދާކުރެއްވިއެވެ. އަދި ރަށް ސާފުކުރުމަށް މަތިވެރީގައި ބާއްވާ މި ޙަރަކާތުގައި ރަށުގެ ކުދި ބޮޑު އެންމެންގެ ބައިވެރިވުން ފެނިގެންދާކަމީ ވަރަށް އުފާކުރާ ކަމެއްކަމުގައި ވިދާޅުވިއެވެ.

ސާފުތާހިރު ރަށެއްގެ ގޮތުގައި މަތިވެރި ބޭއްވުމަށް ރަށުގެ ރައްޔިތުން ގުޅިގެން ކުރަމުންދާ މަސައްކަތުން ރައްޔިތުންގެ މެދުގައި އޮތް އެކުވެރިކަމާ އެއްބައިވަންތަކަމާ އިޖުތިމާއީ ރޫޙް ވަރަށް ބޮޑަށް ފާހަގަ ކުރެއްވިގެންދާ ކަމަށް ވެސް ވިދާޅުވިއެވެ.

ރަށްސާފުކުރުމުގެ މި ޕްރޮގްރާމަކީ 2016 ވަނަ އަހަރުން ފެށިގެން މަތިވެރީ ކައުންސިލުން އިންތިޒާމުކޮށް، ސިލްސިލާކޮށް ބާއްވަމުން އަންނަ ޙަރަކާތެކެވެ. މި ޙަރަކާތުގެ މައިގަނޑު މަޤްޞަދަކީ ބޮޑު ޢީދަށް ރަށް ސާފުކޮށް ޒީނަތްތެރިކުރުމެވެ.މަތިވެރިއަކީ ހިތްގައިމު މަންޒިލަކަށް ހެދުމީ ވެސް މި ޕްރޮގްރާމުގެ މަޤްޞަދެކެވެ. މިއަދު ހެނދުނު 7:00 ގައި ފެށި މިހަރަކާތުގައި ރަށުގެ ކުދިބޮޑު އެންމެން ބައިވެރިވާކަމަށް އެރަށު ކަންސިލުންބުންޏެވެ.