ޕީޕަލްސް ނެޝަނަލް ކޮންގްރެސް (ޕީއެންސީ)ގެ އިސް ވަފުދެއް ނޮޅިވަރަމް ދާއިރާގެ ރައްތަކަށް ފުރައިފިއެވެ.

ޕީއެންސީން އެކްސްގައި ކުރި ޕޯސްޓެއްގައި ބުނީ އެ ޕާޓީގެ ލީޑަރޝިޕްގެ ފަރާތުން ނޮޅިވަރަމް ދާއިރާއަށް ދަތުރެއް ފަށާފައިވާ ކަމަށެވެ.

މި ޓީމްގައި ޕީއެންސީގެ ސެކްރެޓަރީ ޖެނެރަލް މުއާޛް ހަލީމާއި، ޕީއެންސީގެ ޕާލަމެންޓަރީ ގްރޫޕްގެ ޑެޕިއުޓީ ލީޑަރ ވިލިމާލެ ދާއިރާގެ މެމްބަރު މުހައްމަދު އިސްމާއީލާއި، ޕީއެންސީގެ ސެނެޓަރ އެލްޖީއޭގެ ސީއީއޯ ނިމާލްގެ އިތުރުން ނޮޅިވަރަމް ދާއިރާގެ މެމްބަރު މުހައްމަދު ރަޝީދު ވެސް ހިމެނިވަޑައިގަންނަވައެވެ.

މައުލޫމާތު ލިބޭގޮތުގައި މި ދަތުރަކީ ޕާޓީގެ މެމްބަރުންނާއި ވީހާވެސް ގާތުން މަސައްކަތްކޮށް، ރައްޔިތުންގެ އަޑުއަހައި ހާލު ބެލުމަށް ޕާޓީގެ ރައީސް، ރައީސް ޑރ. މުޙައްމަދު މުޢިއްޒުގެ އިރުޝާދުފުޅުގެ ދަށުން ފައްޓަވާފައިވާ ސިލްސިލާ ދަތުރުތަކުގެ ތެރެއިން ދަތުރެކެވެ.

މިވަގުތު ވެރިކަމުގައި ތިބި ޕީއެންސީ އަކީ މިހާރު ރާއްޖޭގެ އެންމެ ބޮޑު ސިޔާސީ ޕާޓީއެވެ.

ނޮޅިވަރަމް ދާއިރާގައި ހިމެނެނީ ނޮޅިވަރަމާއި ނޮޅިވަރަންފަރެވެ. މިއީ ޕީއެންސީ އަށް ވަރަށް ތާއީދު ބޮޑު ދެ ރަށެވެ.