ކުރިއަށް އޮތް 2028 ވަނަ އަހަރުގެ ރިޔާސީ އިންތިހާބު ފަސޭހަކަމާއެކު ރައީސުލްޖުމްހޫރިއްޔާ ޑރ. މުހައްމަދު މުއިއްޒަށް ކާމިޔާބުކޮށްދެވޭނެ ކަމުގައި ޕީއެންސީގެ ޗެއާޕާސަން އަދި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ.

އަބްދުއްރަހީމް މިހެން ވިދާޅުވީ ވެރިކަން ކުރާ ޕީއެންސީގެ ކޮންގްރެސް އިންތިޒާމު ކުރުމުގައި ހަރަކާތްތެރިވި ބޭފުޅުންނަށް ޝުކުރުއަދާކުރެއްވުމުގެ ގޮތުން އާޓިފިޝަލް ބީޗުގައި ރޭ ބެއްވި ހަފްލާއެއްގައި ވާހަކަދައްކަވަމުންނެވެ.

ކޮންގްރެސްގެ ތެރެއިން ޕީއެންސީގެ މެންބަރުންގެ ފަރާތުން ފެނުނީ ޖޯޝާއި ފޯރިއާއެކު އަދި ބަދަހިކަމާއެކު މަސައްކަތް ކުރެއްވި މަންޒަރު ކަމަށް އަބްދުއްރަހީމް ވިދާޅުވި އެވެ. އެގޮތަށް ހުރިހާ މެންބަރުން މަސައްކަތްކޮށްފިނަމަ 2028 ވަނަ އަހަރުގެ ރިޔާސީ އިންތިހާބުގައި ރައީސް މުއިއްޒަށް ކާމިޔާބީ ލިބިވަޑައިގަންނަވާނެ ކަމަށް ޝައްކު ނުކުރައްވާ ކަމުގައި ވިދާޅުވި އެވެ.

"މަތީ މަޖިލިސް ނިމިގެން ދިޔައިރު މިއޮތީ އަޅުގަނޑުމެންގެ 2028ގެ ކެމްޕެއިން ޓީމު ވަރަށް ރަނގަޅަށް ތަރުތީބުކުރެވިފައި،" އަބްދުއްރަހީމް ވިދާޅުވި އެވެ.

Ad by Hajj Corporation

އެމަނިކުފާނު ވިދާޅުވީ ރާއްޖޭގައި މިހާތަނަށް ބޭއްވި އެންމެ ފުރިހަމަ ކޮންގްރެސްއަކީ ނިމިގެން ދިޔަ ޕީއެންސީގެ ކޮންގްރެސް ކަމަށެވެ. ޕީއެންސީ އަކީ މިހާރު ރާއްޖޭގެ އެންމެ ބޮޑު ސިޔާސީ ޕާޓީ ކަމަށްވާތީ ޕީއެންސީގެ ކޮންގްރެސްއަށް ގޮންޖަހާލެވޭ ވަރުގެ ކޮންގްރެސްއެއް ނުބޭއްވޭނެ ކަމަށެވެ.

އަބްދުއްރަހީމުގެ ވާހަކަފުޅުގައި ވަނީ ޕާޓީގެ ކޮންގްރެސްގައި ލިބުނު މައުލޫމާތުގެ ބޭނުން ހިފައިގެން، އެންމެ ވަގުތެއްވެސް ބޭކާރު ކުރުމަކާއި ނުލައި ރިޔާސީ އިންތިހާބު ރައީސް ޑރ. މުއިއްޒަށް ކާމިޔާބު ކޮށްދިނުމަށް ހުރިހާ މެންބަރުން މަސައްކަތް ކުރުމަށް އެދިވަޑައިގެންފަ އެވެ.

"ބިނާކުރަނިވި ފިިކުރު މިއަދު އޮތީ ބަޔަކު އަދި ހިތްހަމަޖެހުނަސް ނުޖެހުނަސް ރައީސް ޑރ. މުހައްމަދު މުއިއްޒާ އެކީގައި،" އަބްދުއްރަހީމް ވިދާޅުވި އެވެެ.

ޕީއެންސީގެ ކޮންގްރެސްގައި ވަނީ 2028 ވަނަ އަހަރުގެ ރިޔާސީ އިންތިހާބުގައި ވާދަކުރެއްވުމަށްޓަކައި އެ ޕާޓީގެ ރިޔާސީ ޓިކެޓް ރައީސް ޑރ. މުއިއްޒަށް އަރުވާފަ އެވެ.