ދާޚިލީ ސަލާމަތާއި ފަންނިޔަތާބެހޭ ވުޒާރާއިން ހުސްވެފައިވާ ޕޮލިސް ކޮމިޝަނަރުގެ މަޤާމަށް ކުރިމަތިލުމުގެ ފުރުޞަތު މިއަދު ހުޅުވާލައިފައެވެ.

މި މަޤާމަށް ކުރިމަތިލެވޭނީ މިހާރު އެސިސްޓެންޓް ކޮމިޝަނަރުގެ ރޭންކުން ފެށިގެން މަތީގެ ރޭންކްތަކުގައި ތިއްބެވި އޮފިސަރުންނަށެވެ.

ވުޒާރާއިން ކުރި އިޢުލާނުގައި ބަޔާންކޮށްފައިވާ ގޮތުގައި، މި މަޤާމަށް ކުރިމަތިލުމުގެ ސުންގަޑިއަކީ ޖޫން 2 ވަނަ ދުވަހުގެ މެންދުރު 12:00 އެވެ. ޝައުޤުވެރިވާ ފަރާތްތަކުން މި މުއްދަތުގެ ތެރޭގައި އެކަމަށް އެދި ހުށަހަޅަންވާނެއެވެ.

ޤާނޫނުގައި ބަޔާންކޮށްފައިވާ ގޮތުން، ޕޮލިސް ކޮމިޝަނަރުގެ މަޤާމަށް ބޭފުޅަކު އައްޔަންކުރެވޭނީ ޕޮލިސް ބޯޑުން އިންޓަވިއުކޮށް، ޤާބިލުކަން ވަޒަންކުރުމަށްފަހުގައެވެ. މި ޕްރޮސެސް ނިމުމުން، ޕޮލިސް ބޯޑުން ހޮވާލެވޭ ނަންތައް ދާޚިލީ ސަލާމަތާއި ފަންނިޔަތާބެހޭ ވުޒާރާއަށް ހުށަހަޅާނެއެވެ. އޭގެފަހުން، ވަޒީރުގެ ލަފާގެ މަތިން ރައީސުލްޖުމްހޫރިއްޔާ، ޕޮލިސް ކޮމިޝަނަރުގެ މަޤާމަށް ބޭފުޅަކު އައްޔަންކުރައްވާނެއެވެ.

މި މަޤާމުގައި އެންމެ ފަހުން ހުންނެވި އަލީ ޝުޖާޢު ވަނީ ފުލުހުންގެ ޚިދުމަތުން ޝަރަފްވެރިކަމާއެކު ރިޓަޔަރ ކުރައްވާފައެވެ. ޝުޖާޢު ކޮމިޝަނަރ އޮފް ޕޮލިސްގެ މަޤާމަށް އައްޔަންކުރެވުނީ 2023 ވަނަ އަހަރުގެ ޑިސެމްބަރު 24 ވަނަ ދުވަހުއެވެ.

މި މަޤާމަށް އައު ބޭފުޅަކު އައްޔަންކުރުމުގެ މަސައްކަތް ކުރިއަށްދާއިރު، މިވަގުތު އެކްޓިން ކޮމިޝަނަރ އަކަށް ހުންނެވީ އިސްމާއީލް ނަވީން އެވެ.