އީދު އުފާ ފާޅު ކުރުމުގައި އެންމެ ހެޔޮގޮތަކީ ނަބަވީ ހިދާޔަތަށް ތަބާވުން ކަމަށް އިސްލާމީކަންތައްތަކާ ބެހޭ ވަޒީރު ޑރ.މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.

ސޯޝަލް މީޑިއާގައި ކުރެއްވި ޕޯސްޓެއްގައި ވަޒީރު ވިދާޅުވީ ޢީދަކީ އިސްލާމީ މަތިވެރި ޝިޢާރެއްކަމަށާ އެއީ މުސްލިމުންނަށް އަންނަ ވަރަށް ހާއްސަ އަދި ވަރަށް މާތް ދުވަހެއް ކަމަށެވެ. އީދު އުފާ ފާޅުކުރުމުގައި އެންމެ ހެޔޮ ގޮތަކީ ނަބަވީ ހިދާޔަތަށް ތަބާވުންކަމަށް ޝަހީމް ވިދާޅުވި އެވެ.

ޝަހީމް ވިދާޅުވީ އިސްލާމީ މުޖުތަމަޢުގައި އިސްލާމީ ގިއުގަނޑުގެ ތެރޭގައި ޢީދުގެ އުފާވެރިކަމާއި މަތިވެރިކަމާއި މާތްކަން ދެމެހެއްޓުމަށް މުސްލިމުން ސަމާލުކަން ދޭންޖެހޭނެ ކަމަށެވެ.

މީލާދީ ސަނަތުން 2025 ވަނަ އަހަރުގެ މޭ މަހުގެ 28 ވާ ބުދަ ދުވަހަކީ 1446 ވަނަ އަހަރުގެ ޛުލްޙިއްޖާ މަހުގެ 01 ވަނަ ދުވަހެވެ. އަދި ޖޫން މަހުގެ 05 ވާ ބުރާސްފަތި ދުހަކީ 1446 ވަނަ އަހަރުގެ ޙައްޖު ދުވަހެވެ. އެހެންވީމާ ޖޫން މަހުގެ 6 ވަނަ ދުވަހަކީ މިއަހަރުގެ އަލްހާ އީދެވެ. މިއަހަރުގެ ޙައްޖުގެ އަޅުކަމަށް ދިވެހިރާއްޖެއިން ފުރާ އެންމެހާ ޙައްޖުވެރިން މިހާރު ވަނީ ސަޢުދީ ޢަރަބިއްޔާއަށް ގޮސްފައެވެ.

ކުރިޔަށް އޮތް ބޮޑު ޢީދު ފާހަގަކުރުމުގެ ގޮތުން، ރާޢްޖޭގެ އެކިކަންކޮޅުތަކުގައި ގިނަ ހަރަކާތްތަކެއް ކުރިއަށް ގެންދިޔުމަށް ވަނީ ނިންމާފަ އެވެ.