Ad by Hajj Corporation

މިއަދު ހަވީރު މާލެ ކައިރީގައި ލޯންޗަކާއި ޓަގް ބޯޓެއް ޖެހި އެކްސިޑެންޓެއް ހިނގައިފިއެވެ.

މެރިން ޕޮލިހުން މަޢުލޫމާތު ދިންގޮތުގައި މި އެކްސިޑެންޓް ހިނގާފައިވަނީ މިއަދު މެންދުރުފަހު 15:30 ހާއިރު، މާލެއިން އަރިއަތޮޅު އުތުރުބުރިއަށް ދަތުރުކުރި ލޯންޗަކާއި މާލޭގެ އެމްޕީއެލް ޖެޓީއަށް ވަންނަން ދިޔަ ޓަގް ބޯޓެއް ޖެހިގެންނެވެ.

މި ހާދިސާގައި ލޯންޗުގެ ކެޕްޓަނަށް އަނިޔާވެފައިވާކަމަށާއި، އޭނާއަށް ވަނީ ހޮސްޕިޓަލުގައި ފަރުވާ ދީފައިވާކަމަށް މެރިން ޕޮލިހުން ބުންޏެވެ. ނަމަވެސް، މި އެކްސިޑެންޓުގައި އިތުރު އެއްވެސް މީހަކަށް އަނިޔާވެފައި ނުވާކަމަށް ވެސް މެރިން ޕޮލިހުން ހާމަކުރިއެވެ.

މި އެކްސިޑެންޓުގައި ލޯންޗަށް ލިބުނު ގެއްލުމުގެ ދެ ފޮޓޯއެއް މެރިން ޕޮލިހުން ވަނީ މީސްމީޑިއާގައި ހިއްސާކޮށްފައެވެ. މި ފޮޓޯތަކުން ފެންނަ ގޮތުގައި ލޯންޗް ޓަގު ބޯޓާ ޖެހުނު ހިސާބުން ބައެއް ވަނީ ފަޅައިގެން ގޮސްފައެވެ. އަދި ލޯންޗުގެ ބިއްލޫރިތައް ތަޅައިގެން ގޮސްފައިވާ މަންޒަރު ވެސް ފެނެއެވެ.

މި މައްސަލައިގެ ތަޙުޤީޤު މެރިން ޕޮލިހުން ކުރިއަށް ގެންދާ ކަމަށް ބުނެފައިވާއިރު، އިތުރު ތަފްސީލު އަދި ހާމަކޮށްފައެއް ނުވެއެވެ.