ބައްޕައަކު އޭނާގެ ދަރިއަކާ މެދު ޖިންސީ އަމަލެއް ހިންގި ކަމުގެ ކުށް ސާބިތުވެގެން އިއްވާފައިވާ 15 އަހަރުގެ ޖަލު ހުކުމެއް ބާތިލްކޮށް އެ މައްސަލަ އަލުން ބަލަން ހައި ކޯޓުން ނިންމައިފި އެވެ.

މި މައްސަލައިގައި ހުކުމްކުރި ކޯޓުގެ ނަން ހައި ކޯޓުން ވަނީ ސިއްރުކޮށްފައެވެ. ނަމަވެސް ބެލެވޭ ގޮތުގައި އެއީ ރަށެއްގެ މެޖިސްޓްރޭޓް ކޯޓަކުން އިއްވާފައިވާ ހުކުމެކެވެ. މި މައްސަލަ ހުށަހެޅުނީ 2021 ވަނަ އަހަރުގެ ސެޕްޓެމްބަރު މަހު ކަމަށާއި، ހުކުމް އިއްވާފައިވަނީ 2023 ވަނަ އަހަރުގެ އޮކްޓޫބަރު މަހު ކަމަށް ހައި ކޯޓުގެ ހުކުމުގައި ބަޔާންކޮށްފައިވެއެވެ.

އެ މައްސަލާގައި ހުކުމް އައިސްފައިވާ މީހާ މި ހުކުމް ހައި ކޯޓުގައި އިސްތިއުނާފުކޮށްފައިވެއެވެ. އޭނާ ބުނެފައިވަނީ ހަ އަހަރުގެ ދަރިފުޅުގެ ކުރިމަތީ ފަރާތާއި މޭމަތީގައި އަތްލި ކަމަށް ބުނެ ހުކުމްކޮށްފައިވަނީ، ސުޕްރީމް ކޯޓުގެ ހުކުމެއްގައި ކަނޑައަޅާފައިވާ މިންވަރަށް ހެކި ނެތި ކަމަށެވެ.

ހައި ކޯޓުން މައްސަލަ ބެލުމަށްފަހު ނިންމާފައިވަނީ، ކުއްޖާގެ ސައިކޮލޮޖިކަލް އެސެސްމަންޓް ހެދި ފަރާތް ކޯޓަށް ހާޒިރުކޮށް ދިފާއުން އެ ހެކިވެރިޔާއާ ސުވާލުކުރަން ފުރުސަތުދީ، މައްސަލައިގައި ދެން ހުރި ހެކިތައް ޝަރީއަތުން އަލުން ވަޒަންކުރުމަށް ފަހުގައި ނޫނީ މި މައްސަލައިގައި އިންސާފަށް ވާސިލުނުވެވޭނެ ކަމަށެވެ.

މި ކަންކަމަށް ބަލައި ހައި ކޯޓުން ހުކުމް ކޮށްފައިވަނީ އެ އިރުޝާދާ އެއްގޮތަށް ދަށުކޯޓުން އަލުން ޝަރީއަތް ހިންގުމަށްޓަކައި މައްސަލަ އަލުން އެ ކޯޓަށް ފޮނުވުމާ އެކު މިހާރު ކޮށްފައިވާ 15 އަހަރުގެ ޖަލު ހުކުމް ބާތިލްކުރުމަށެވެ.

މި މައްސަލައިގައި ދައުލަތުން ބުނެފައިވަނީ ކުއްޖާ ދައްކާފައި ހުރި ވާހަކަތަކަކީ އެ އުމުރުގެ ކުއްޖަކު ހަދަހަދައިގެން ދައްކާނެ ކަހަލަ ވާހަކަ ނޫން ކަމަށެވެ. އަދި ކުއްޖާގެ މެޑިކޯ ލީގަލް ރިޕޯޓްގައި، ކުއްޖާއަށް އަނިޔާއެއް ވެފައި ނެތް ކަމަށް އޮތުމަކީ ކުއްޖާ ކިޔައިދިން ކަންކަން ބަލައިނުގަނެވޭނެ ސަބަބެއް ނޫން ކަމަށް ވެސް ދައުލަތުން ބުނެފައިވެއެވެ.