ސައުދީ އަރަބިއްޔާގެ އެންމެ ވަރުގަދަ އެއް ކުލަބު އަލް ހިލާލްގެ ކޯޗަކަށް ނިމިދިޔަ ޗެންޕިއަންސް ލީގުގެ ފައިނަލުން ބަލިވި އިންޓަރ މިލާނުގެ ކޯޗު ސިމޯނެ އިންޒާގީ ހަމަޖައްސައިފިއެވެ. މި އެއްބަސްވުމަކީ ދެ އަހަރު ދުވަހުގެ އެއްބަސްވުމެކެވެ.

49 އަހަރުގެ އިންޒާގީ އަކީ ޔޫރަޕްގެ އެންމެ ކާމިޔާބު ކޯޗުންގެ ތެރެއިން ކޯޗެކެވެ. އޭނާ ވަނީ އިޓަލީގެ އިންޓަރ މިލާން އަދި އޭގެ ކުރިން ލާޒިއޯ އަށް ކޯޗުކޮށް، 2023/2024 ވަނަ ސީޒަނުގައި އިންޓަރ މިލާނާއެކު ސެރީއާ ގެ ޗެމްޕިއަންކަން ހޯދައި، ދެ ފަހަރެއްގެ މަތިން ކޮޕާ އިޓާލިއާ އަދި ތިން ފަހަރެއްގެ މަތިން އިޓަލީގެ ސުޕަރ ކަޕް ހޯދާފައެވެ. މީގެ އިތުރުން އޭނާގެ ޓީމުތަކާއެކު ޗެމްޕިއަންސް ލީގުގެ ފައިނަލަށްވެސް ދެފަހަރު ކުޅެފައިވެްއެވެ.

Ad by Hajj Corporation

އިންޒާގީ އަށް ވަނީ 2023/2024 ވަނަ ސީޒަނުގައި "އަހަރުގެ އެންމެ މޮޅު ކޯޗު" އަދި "ސެރީ އޭގެ އެންމެ މޮޅު ކޯޗު" ގެ މަގާމު ހޯދާފައިވެއެވެ.

އިންޒާގީ އަލް ހިލާއް އާއެކު މަސައްކަތްފަށާފައިވާއިރު، އޭނާ ކުލަބް ވޯލްޑް ކަޕުގައި އަލް ޙިލާލްގެ ކޯޗުގެ ގޮތުގައި ފެނިގެންދާނެއެވެ. މި މުބާރާތް ފެށޭނީ ޖޫން 15 ވަނަ ދުވަހު އެމެރިކާގައެވެ. އަލް ހިލާލްގެ ފުރަތަމަ މެޗު ކުޅޭނީ ޖޫން 18 ވަނަ ދުވަހު މަޔާމީގައި ރެއަލް މެޑްރިޑާ ދެކޮޅަށެވެ.

އިންޒާގީއަށް އަހަރަކު 25 މިލިޔަން ޔޫރޯގެ މުސާރައެއް އަލް ހިލާލްއިން ހުށަހަޅާފައިވާއިރު، އޭނާވެގެންދާނީ ދުނިޔޭގައި މިވަގުތުހުރި އެންމެ މުސާރަ ބޮޑު ކޯޗުގެ ގޮތުގައެވެ. މިލިސްޓުގެ ދެވަނައިދައި ސިޓީގެ ކޯޗު ގުއާޑިއޯލާ އޮތްއިރު، ތިންވަނައިގައި އޮތީ އާރސެނަލްގެ ކޯޗު އާޓޭޓާއެވެ.