މި އަހަރުގެ ޙައްޖު މޫސުމުގައި ޙައްޖާޖީންގެ ސަލާމަތާއި ރައްކާތެރިކަން ކަށަވަރު ކުރުމަށްޓަކައި ހައްޖު ކޯޕަރޭޝަންގެ މާލޭ ހެޑް އޮފީހުން 24 ގަޑިއިރު ޝިފްޓް ޑިއުޓީގައި މަސައްކަތް ކުރަމުންދާ ކަމަށް އެ ކޯޕަރޭޝަނުން މަޢުލޫމާތު ދީފިއެވެ.

ޙައްޖު ކޯޕަރޭޝަންގެ މެނޭޖިން ޑިރެކްޓަރު މުޙައްމަދު ޝަކީލް މަޢުލޫމާތު ދިން ގޮތުގައި، ޙައްޖުވެރިން މައްކާއިން މިނާއަށް ދަތުރު ފެށި ދުވަހުން ފެށިގެން ޙައްޖުވެރިން ލޮކޭޓްކޮށް، އެ ފަރާތްތަކުގެ ސަލާމަތާއި ރައްކާތެރިކަން ކަށަވަރު ކުރުމުގެ މަސައްކަތް މެދުނުކެނޑި ކުރިއަށް އެބަ ދެއެވެ.

Ad by Hajj Corporation

އެއްވެސް ޙާޖީއެއް ކަނޑައެޅިފައިވާ ސަރަޙައްދުން ބޭރަށް ނުކުމެއްޖެނަމަ، އެ ޙައްޖުވެރިއަކާ ގުޅައި އެ ފަރާތުގެ ޙާލު ބަލައި، ސަލާމަތާއި ރައްކާތެރިކަން ކަށަވަރު ކުރުމުގެ މަސައްކަތް މާލޭ ހެޑް އޮފީހުން ކުރިއަށް ގެންދާނެ ކަމަށް ވެސް ޝަކީލް ފާހަގަކުރަށްވާފަވެއެވެ.

މީގެއިތުރުން، އެހީތެރިކަން ބޭނުންވާ ޙާޖީންނަށް ސަޢޫދީ ޢަރަބިއްޔާގައި ތިބި އެހީތެރިން މެދުވެރިކޮށް އެހީތެރިކަން ފޯރުކޮށްދެމުން ގެންދާނެ ކަމަށް ވެސް ޝަކީލް ވިދާޅުވެފަވެއެވެ.

މިއީ ޙައްޖާޖީންގެ ސަލާމަތާއި ރައްކާތެރިކަން ކަށަވަރު ކުރުމަށް އެޅޭ މުހިންމު ފިޔަވަޅެއް ކަމަށް ވެސް ޝަކީލަ ފާހަގަކުރަށްވާފަވެއެވެ.