ޒަކާތު ފަންޑަަށް މިހާތަނަށް 77 މިލިއަން ރުފިޔާ ލިބިފައިވާ ކަމަށާއި، އަމާޒަކީ އަންނަ އަހަރު 100 މިލިއަން ރުފިޔާއަށް އިތުރުކުރުން ކަމަށް އިސްލާމިކް މިނިސްޓަރު ޑރ. ޝަހީމް އަލީ ސައީދު ވިދާޅުވެއްޖެއެވެ.

އިސްލާމިކް މިނިސްޓްރީގެ ބައެއް މަސައްކަތްތަކާއި ގުޅޭގޮތުން މައުލޫމާތު ދިނުމަށް ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި މިނިސްޓަރު ޑރ. ޝަހީމް ވިދާޅުވީ، މި އަހަރުގެ މިހާތަނަށް 77 މިލިއަން ރުފިޔާ ޒަކާތު ފަންޑަށް ލިބިފައިވާ ކަމަށާއި، އެއީ އެހެން އަހަރުތަކާ އަޅާ ބަލާއިރު 11 ޕަސެންޓްގެ ކުރިއެރުމެއް ކަމަށެވެ. އަދި އަމާޒަކީ އަންނަ އަހަރު އެ އަދަދު 100 މިލިއަނަށް އިތުރުކުރުމަށް މަސައްކަތް ކުރުން ކަމަށް މިނިސްޓަރު ވިދާޅުވިއެވެ.

Ad by Hajj Corporation

" އަމާޒަކީ 2025 ގައި 100 މިލިއަން ރުފިޔާއަށް ޒަކާތު ފަންޑު އިތުރުކުރުން. ޒަކާތު ފަންޑު 100 މިލިއަނަށް އިތުރުކުރެވިއްޖެނަމަ އެއީ ޒަކާތުގެ ތާރީހު ރާއްޖޭގައި ބަދަލުކޮށްލެވުން." މިނިސްޓަރު ވިދާޅުވިއެވެ.

މީހެ އިތުރުން ޒަކާތު ފަންޑަށް މީހުން ހޭލުންތެރިކަން އިތުރުކުރުމަށް ވަރަށް ގިނަ މަސައްކަތްތަކެއް ކުރައްވަމުން ގެންދަވާކަން ފާހަގަކުރައްވައި މިނިސްޓަރު ވިދާޅުވީ، މިއަހަރުގެ މިހާތަނަށް މީހުން ހޭލުންތެރިކުރުމުގެ 59 ހަރަކާތެއް ކުރިއަށް ގެންގޮސްފައިވާ ކަމަށެވެ.

އިސްލާމިކް މިނިސްޓްރީން ކުރިއަށްގެންދާ ބައެއް މަސައްކަތްތަކަށް އަލިއަޅުއްވާލައްވަމުން މިނިސްޓަރުވަނީ ރާއްޖޭގައި އިސްލާމީ ކަންތައްތައް ކުރިއަރުވާ ދަމަހައްޓަވަން ސަރުކާރުން ވަރަށް ގިނަ މަސައްކަތްތަކެއް ކުރައްވަމުންދާ ކަމަށް ވިދާޅުވެފައެވެ. އެގޮތުން އިމާމުންގެ ތައުލީމީ ފެންވަރު މަތިކޮށް ތަމްރީނުކުރަން ސަރުކާރުން ފެއްޓަވައި މިހާތަނަށް 402 އިމާމުން ތަމްރީނުކޮށްފައިވާ ކަމަށްވެސް މިނިސްޓަރު ވިދާޅުވިއެވެ.

މީގެ އިތުރުން އިސްލާމީ ގައުމީ ލައިބްރަރީއެއް ސަލްމާން މިސްކިތުގައި ގާއިމްކުރުމުގެ މަސައްކަތް ކުރަމުން އަންނަކަން ފާހަގަކޮށް މިނިސްޓަރު ވިދާޅުވީ، އެ މަސައްކަތް އަންނަ އަހަރުގެ ޖެނުއަރީ މަހުގެ ތެރޭގައި ފައްޓަވާނެ ކަމަށެވެ.