ރާއްޖެ އެތެރެ ކުރަން އުޅުނު 18 ކިލޯގްރާމްގެ މަސްތުވާތަކެތި ކަސްޓަމްސް އިން އަތުލައިގެންފިއެވެ.

މިކަން ހާމަކުރެއްވީ ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހުސާން އެކްސްގައި ކުރެއްވި ޕޯސްޓެއް މެދުވެރިކޮށެވެ.

އިހުސާން ވިދާޅުވީ، މޯލްޑިވްސް ކަސްޓަމްސް އިން މިރޭ ހިންގި ހާއްސަ އޮޕަރޭޝަނެއްގައި 18 ކިލޯގްރާމްގެ މަސްތުވާތަކެތި ރާއްޖެ އެތެރެކުރަން އުޅެނިކޮށް އަތުލައިގަނެފައިވާ ކަމަށެވެ.

މިތަކެތީގެ މަގުމަތީގެ އަގު ގާތްގަނޑަކަށް 26 މިލިއަން ދިވެހި ރުފިޔާ އަށް އަރާ ކަމަށް ވަޒީރު އިހްސާން ވިދާޅުވެފަވެއެވެ.

"ދިވެހިރާއްޖެ މަސްތުވާތަކެތިން އެއްކޮށް ސަލާމަތްކުރުމަށް ކުރެވޭ މަސައްކަތްތަކުގެ ތެރެއިން ރައީސުލްޖުމްހޫރިއްޔާގެ ޚާއްސަ އިރުޝާދުތަކާއި އެއްގޮތަށް ރާއްޖޭގެ ބޯޑަރު ފުރިހަމަޔަށް ބެލެހެޓުމަށް ކަސްޓަމްސްގެ މުވައްޒަފުން ކުރައްވާ އަގުހުރި ބުރަ މަސައްކަތަށް ޝުކުރުދަންނަވަން. މަސްތުވާތަކެތީގެ ވިޔަފާރިކުރާފަރާތްތަކަށް ފަހިކޮށް އޮތް މާހައުލު ނައްތާލައި އެފަރާތްތަކާ ޤާނޫނު ދަނީ އަރާހަމަކުރަމުން،". ވަޒީރު ވިދާޅުވެފަވެއެވެ.

ކަސްޓަމްސް އިން މިރޭ ބުނީ އަތުލައިގަތީ ވައިގެ މަގުން އެތެރެކުރަން އުޅުނު މަސްތުވާތަކެތި ކަމަށެވެ. އަދި އެއީ މަސްތުވާތަކެތީގެ ބާވަތެއްކަމަށްވާ ކެނަބިނޮއިޑްސް ކަމަށް ވެސް ކަސްޓަމްސް އިން ބުންޏެވެ.

ރާއްޖޭގައި އޮތް މަސްތުވާތަކެތީގެ މައްސަލަ ހައްލުކުރުމަކީ ރައީސް ޑރ. މުހައްމަދު މުޢިއްޒުގެ ސަރުކާރުން ވަރަށް ބޮޑު އަހައްމިޔަތެއްދެއްވާ ކަމެކެވެ. މިގޮތުން ކުރެވޭ މަސައްކަތުން މި ދައުރުގައި ވަނީ ރެކޯޑް އަދަދަކަށް މަސްތުވާތަކެތީގެ އޮޕަރޭޝަންތައް ހިންގައި ރެކޯޑް އަދަދަކަށް މަސްތުވާތަކެތި އަތުލައިގެންފައެވެ.

މަސްތުވާތަކެތީގެ ޝިކާރައަކަށް ވެފައިވާ މީހުން އަލުން މުޖުތަމައު އަށް ނެރުމަށް ފަރުވާ ޕްރޮގްރާމް ވެސް މި ސަރުކާރުން ވަނީ ވަރަށް ބޮޑަށް ހަރުދަނާކޮށް، އެންޑީއޭގެ ދައުރު ވަނީ ވަރަށް ވޮޑަށް ފުޅާކޮށްފައެވެ.

މީގެ އިތުރުން މަސްތުވާތަކެއްޗާ ބެހޭ ޒަމާނީ ޤާނޫނެއް ހެދުމުގެ މަސައްކަތް ފަށައި އެކަމަށް ބޭނުންވާ ބިލު މިހާރު އޮތީ މަޖިލީހުގެ ކޮމެޓީ މަރުހަލާގައެވެ.