އިންޑިއާގެ ދެކުނު ކޭރަލާ ސްޓޭޓުގެ އައްސޭރިފަށާ ކައިރީގައި، އަރަބި ކަނޑުގައި ދަތުރުކުރަމުންދިޔަ ސިންގަޕޫރުގެ ދިދަ ޖަހާފައިވާ މުދާ އުފުލާ އުޅަނދެއްގައި ރޯވެއްޖެއެވެ.

މިއީ ކާބޯ ބޯޓެކެވެ. މި ބޯޓުގައި ރޯވެފައިވާ އަލިފާން ނިއްވުމަށް އިންޑިއާގެ ކޯސްޓް ގާޑުން މަސައްކަތްތަކެއް ކުރަމުން އަންނައިރު، މި ބޯޓަކީސްރީލަންކާގެ ވެރިރަށް ކޮލޮމްބޯއިން އިންޑިއާގެ މުންބާއީ ސިޓީއަށް ދަތުރުކުރަމުންދިޔަ ބޯޓެކެވެ.

'' އެމްވީ ވަން ހާއީ 503 '' ކިޔާ މި ބޯޓުގައި ހުރި ކޮންޓެއިނަރެއް ގޮވައި، އޭގެ ސަބަބުން އުޅަނދުގައި ބޮޑު އަލިފާނެއް ރޯވެފައިވާކަން ހޯމަ ދުވަހު ވަނީ ރިޕޯޓުކޮށްފައެވެ.

މި ހާދިސާގައި 18 ފަޅުވެރިން ސަލާމަތްކުރެވިފައިވާއިރު، 4 މީހުން އަދިވެސް ދަނީ ހޯދަމުންނެވެ. ސިންގަޕޫރުގެ ފަރާތުން ވަނީ ފަޅުވެރިން ސަލާމަތްކުރުމުގެ މަސައްކަތުގައި އެހީތެރިވުމަށް ޚާއްޞަ ޓީމެއް ފޮނުވާފައެވެ.

އުޅަނދުން ތެޔޮ ލީކުވެ، އަދި އުޅަނދުގެ ބައިތައް ފެތުރުމުގެ ފުރުސަތު އޮތުމާ ގުޅިގެން އިންޑިއަން ނެޝަނަލް ސެންޓަރ ފޮރ އޯޝަން އިންފޮމޭޝަން ސަރވިސަސް (އައިއެންސީއޯއައިއެސް) އިން ވަނީ ކޭރަލާގެ އައްސޭރިފަށުގެ ސަރަޙައްދުތަކަށް ރައްކާތެރިވުމަށް އިންޒާރު ދީފައެވެ.