މިދިޔަ މޭއި މަހުގެ 25 އިން ފެށިގެން ގާތްގަޑަކަށް މަހެއްހާ ދުވަހަށް މާލޭގެ ގެއެއްގެ އެޕާޓްމެންޓެއްގައި މީހަކު ރަހީނުކޮށްގެން ގެންގުޅެ، އަނިޔާކުރީ ޑްރަގުގެ މައްސަލައެއްގައި ކަމަށް ދިވެހި ފުލުހުންގެ ޚިދުމަތުން ބުނެފިއެވެ. މި މައްސަލައިގައި އަށާރަ އަހަރުން ދަށުގެ ތިން ކުއްޖަކާއި ފަސް މީހަކުވަނީ ހައްޔަރުކޮށްފައެވެ. މީގެ ތެރޭގައި ދިވެހި ސިފައިންގެ ޚިދުމަތުގައި މަސައްކަތްކުރާ ދެމީހުން ހިމެނެއެވެ. 18 އަހަރުން ދަށުގެ ކުދިންނަށް ވުމުން، އެ ކުދިންގެ ވަނަވަރު ފުލުހުން ހާމައެއް ނުކުރެއެވެ.

މިކަމާ ގުޅޭ މަޢުލޫމާތު ދެއްވަމުން ޗީފް ސްޕްރިންޓެންޑެންޓް އޮފް ޕޮލިސް ހަސަން ޝިފާއު ވިދާޅުވީ، އެ މައްސަލަ ފުލުހުންގެ ސަމާލުކަމަށް އައީ، މައްސަލައިގައި އަނިޔާ ލިބުނު ފަރާތުން، އަނިޔާއަށް ފަރުވާ ހޯދުމަށް ހުޅުމާލެ ހޮސްޕިޓަލަށް ދިޔުމުން އެ ހޮސްޕިޓަލުގައި ތިބި ފުލުހުންގެ ސަމާލުކަމަށް އެކަން އައި ހިސާބުން ކަމަށެވެ.

އެގޮތުން އެ މައްސަލައިގައި އެ މީހާއަށް ލިބުނު އަނިޔާތައް ފާހާގަ ކުރަމުން ޝިފާއު ވިދާޅުވީ، އެ ޙާދިސާގައި އެ މީހާގެ ކަނާތު ކުޑަވާ އިނގިލީގެ ދެވަނަ ބަނދައިން ފެށިގެން ބުރިކޮށްފައިވާ ކަމަށެވެ. އަދި އެ މީހާގެ ކަނާތު ލޮލަށް ބޮޑެތި އަނިޔާތަކެއް ކޮށް، އެ ލޯ ނޫފައިގެންފައި ހުިރ ކަމަށާއި، އިތުރު އަނިޔާތަކެއް ވެސް ހަށިގަނޑުން ފެންނަން ހުރި ކަމަށް ފުލުހުން ބުންޏެވެ. މި މައްސަލައިގައި ތުހުމަތު ކުރެވޭ މީހުންނަކީ:

• ރ. ކަނދޮޅުދޫ، މެހުރާ، އުމުރުން 24 އަހަރުގެ އަލީ ސާމީ
• ގދ. ގައްދޫ، ހުޅުދެލި، އުމުރުން 18 އަހަރުގެ އަޙްމަދު ސާއިފް ވަހީދު
• ތ. ތިމަރަފުށީ، އުތުރުގެއާގެ، އުމުރުން 21 އަހަރުގެ މުހައްމަދު ނައުޝާން ހުސައިން
• ކ. މާފުށީ، ފުލްމޫން، އުމުރުން 23 އަހަރުގެ މުހައްމަދު ނަފާހް (ސިފައިންގެ ވަޒީފާގައި ހުރި)
• ލ.ގަން، ތުނޑި، ލިންކް، އުމުރުން 24 އަހަރުގެ އަޙްމަދު ޒަޔާން (ސިފައިންގެ ވަޒީފާގައި ހުރި)

އެ މީހުންގެ ތެރެއިން މުހައްމަދު ނަފާހް ފިޔަވައި، ދެންތިބި އެންމެން ވަނީ ޝަރީއަތުން ގޮތެއް ނިމެންދެން ބަންދުކުރުމަށް ކްރިމިނަލް ކޯޓުން ހުކުމްކޮށްފައެވެ. އަދި ނަފާހުގެ މައްޗަށް ވަނީ ތަހުގީގު ނިމެންދެން ބަންދުކުރުމަށް ކްރިމިނަލް ކޯޓުން އަމުރުކޮށްފައެވެ.

ޝިފާއު ވިދާޅުވީ، އެ މައްސަލައާ ގުޅިގެން އެ މީހުން ރަހީނު ކުރި ދެ އެޕާޓްމެންޓެއް ބަލައި ފާސްކުރިއިރު، އެ މީހުންގެ ތެރެއިން އެކެއްގެ ކުންފުންޏަކާ ގުޅޭ ލިޔުންތަކެއް ވެސް ފެނިފައިވާ ކަމަށެވެ. އަދި މަސްތުވާތަކެތި ބަންދުކުރަން ކަމަށް ބެލެވޭ ހުސް ކޮތަޅާއި، ކިރުމަށް ބޭނުންކުރާ ކައްޓާއެއްގެ އިތުރުން، އެ އެޕާޓްމެންޓުން ފެނުނު ވޮލެޓެއްގެ ތެރެއިން މަސްތުވާތަކެތި ކަމަށް ޝައްކުކުރެވޭ އެއްޗެއް ހުރި ޕެކެޓެއް ވެސް ފެނިފައިވާ ކަމަށާއި، އޭގެ އިތުރަށް، އެ އެޕާޓްމެންޓުން ބަނގުރާ ހުސްކުރި ތިން ފުޅި ވެސް ފެނުނު ކަމަށް ޝިފާއު ވިދާޅުވިއެވެ.

އަދި އެ މައްސަލައިގައި ތުހުމަތު ކުރެވޭ ސާމީ، ސާއިފް އަދި ނައުޝާދަކީ މީގެ ކުރިން މަސްތުވާތަކެތީގެ މައްސަލަތަކުގެ ރެކޯޑު އޮތް މީހުން ކަމަށް ވެސް ޝިފާއު ވިދާޅުވިއެވެ. އަދި އެ މައްސަލައިގައި ތުހުމަތު ކުރެވޭ ޒަޔާންގެ ހަށިގަނޑުން ވެސް މަސްތުވާތަކެތި ކަމަށް ބެލެވޭ ދިޔާ އެއްޗެއް ފެނުނު ކަމުގައި ޝިފާއު ވިދާޅުވިއެވެ.