ރާއްޖޭގެ އެންމެ ފުރަތަމަ އިސްލާމީ ވުޒާރާގެ ވަޒީރުކަން ކުރެއްވި ދީނީ ޢިލްމުވެރިޔާ ޑރ. އަބްދުލް މަޖީދު އަބްދުލްބާރީ އަވަހާރަވީ ނޫން ކަމަށާއި، ޝަހީދުކޮށްލީ ކަމަށް މިދިޔަ ސަރުކާރުގެ ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.

އަދާލަތު ޕާޓީގެ މިހާރުގެ ރައީސްކަން ވެސް ކުރައްވާ އިމްރާން މިފަދަ ތުހުމަތެއް ކުރައްވައިފައިވަނީ މިއަދު "އެކްސް" ގައި ކުރެއްވި ޕޯސްޓެއްގައެވެ. އެގޮތުން އެ ޕޯސްޓުގައި އިމްރާން ވަނީ ޑރ. މަޖީދުގެ ކުއްލި މަރާ ގުޅިގެން މިހާތަނަށް ހިތުގައި އުފެދިފައި އޮތް ޝައްކު މިހާރު ޔަގީންކުރެވޭ ހިސާބަށް އައިސްފައިވާ ކަމަށް ވިދާޅުވެފައެވެ. އަދި އެއާއެކު ބަޔަކު، ޑރ. މަޖީދު ޝަހީދުކޮށްލީ ކަމުގައި އިމްރާން ވިދާޅުވިއެވެ.

މިދިޔަ ސަރުކާރުގައި ހޯމް މިނިސްޓަރުގެ މަގާމް އިމްރާން އަދާކުރެއްވި ނަމަވެސް، މިފަދަ ތުހުމަތެއް އަދި ވާހަކައެއް ވެސް ދައްކަވާފައެއް ނުވެއެވެ.

ރާއްޖޭގެ ގިނަ ބައެއްގެ ލޯތްބާއި އިޙްތިރާމު ލިބިފައިވާ ޑރ. މަޖީދު އަވަހާރަވެފައިވަނީ އުމުރުފުފުޅުން 55 އަހަރުގައި، 2018 ވަނަ އަހަރުގެ މޭއި މަހުގެ ތެރޭގައެވެ. މަޖީދު އަވަހާރަވިއިރު ގެންދެވީ ސްޓްރޯކެއް ޖެހި އެކަމަށް ލަންކާގެ ހޮސްޕިޓަލެއްގައި ފަރުވާ ހޯއްދަވަމުންނެވެ. މަޖީދަކީ 2012 ވަނަ އަހަރު ރާއްޖޭގައި އުފެދުނު ވެރިކަމުގައި އުފެއްދި އެންމެ ފުރަތަމަ އިސްލާމީ ވުޒާރާގެ ވަޒީރުކަން ކުރެއްވި ބޭފުޅާއެވެ.

އަދި ގުރުއާނުގެ ތަފްސީރުގެ ދާއިރާއިން ޑޮކްޓަރޭޓް ހާސިލްކުރެއްވި ފުރަތަމަ ދިވެހި ބޭފުޅާއަށް މަޖީދުވާއިރު، މަޖީދަކީ ޤައުމީ ޔުނިވާސިޓީގައި ދަރިވަރުންނަށް ތަޢުލީމު އުނގަންނަވައި ދެއްވި އެދުރެއް ވެސް މެއެވެ.