އިޖްތިމާޢީ ބޯހިޔާވަހިކަމުގެ މަޝްރޫޢުތަކުގެ ދަށުން ހުޅުމާލެއިން ދޫކޮށްފައިވާ ފްލެޓް ތަކުގެ ތެރެއިން ޤަވާއިދުން ކުލި ނުދައްކާ 5099 ފްލެޓަށް ނޯޓިސް ފޮނުވުމުގެ މަސައްކަތް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ފަށައިފިއެވެ.

ބޯހިޔާވަހިކަމުގެ މަޝްރޫޢުތަކުގެ ތެރެއިން ހުޅުމާލެއިން ދޫކޮށްފައިވާ 8511 ފްލެޓްގެ ތެރެއިން ޤަވާއިދުން ކުލި ދައްކަމުން ދަނީ 3219 ފްލެޓަކުންނެވެ. މި ފްލެޓްތަކުން ކުލީގެ ގޮތުގައި ލިބެން ޖެހޭ ފައިސާގެ އަދަދު އުޅެނީ 700 މިލިއަނަށްވުރެ މަތީގައެވެ.

Ad by Hajj Corporation

ފްލެޓްތައް ދޫކުރުމުގައި އެޗްޑީސީއާއެކު ވެފައިވާ އެއްބަސްވުމުގައި ބަޔާންކޮށްފައިވާ ގޮތުން، ޤަވާއިދުން ކުލި ދައްކަމުން ނުދާނަމަ އެ ފްލެޓެއް އަތުލުމުގެ ބާރު އެ ކުންފުންޏަށް ލިބެއެވެ. އެހެންކަމުން، ކުލި ނުދައްކާ ފަރާތްތަކަށް ކޮންމެ ތިން މަހުން އެއް ފަހަރު ނޯޓިސް އެއް ދިނުމަށް ނިންމާފައިވާ ކަމަށާއި، މި ގޮތުން ކުލި ދައްކަމުން ނުދާނަމަ ޤާނޫނީ ގޮތުން އެޅެން ހުރި ފިޔަވަޅުތައް އަޅަމުން ގެންދާނެކަން އެ ކުންފުނިން ވަނީ ހާމަކޮށްފައެވެ.

ނަމަވެސް ކުލި ނުދެއްކުމުގެ ސަބަބުން މިހާތަނަށް އެއްވެސް ފްލެޓެއް އަތުލާފައެއް ނުވެއެވެ.