ދައުލަތަށް ނުލިބިހުރި ފައިސާގެ ތެރެއިން ތަންފީޒީ ފިޔަވަޅުތަކާއެކު، 3.7 ބިލިޔަން ރުފިޔާ ހޯދައިފިއެވެ. މިކަން ހާމަކޮށްފައިވަނީ މީރާއިން އާންމުކޮށްފައިވާ މިދިޔަ އަހަރުގެ އަހަރީ ރިޕޯޓުގައެވެ.

ދައުލަތަށް ޓެކްސް އަދި އެނޫން ގޮތްގޮތުންވެސް ގިނަ އަދަދެއްގެ ފައިސާ ނުލިބިހުރިއިރު، މި ފައިސާ ހޯދުމަށް ގިނަ މަސައްކަތްތަކެއް މިދިޔަ އަހަރުވެސް މީރާއިން ކޮށްފައިވެއެވެ. އެގޮތުން، މިދިޔަ އަހަރު ފައިސާ ދެއްކުމަށް އަންގައި 36،843 ފަރާތަކަށް ނޯޓިސް ފޮނުވާފައިވެއެވެ. އަދި އޭގެ ތެރެއިން 8،139 ފަރާތަކުން ނޯޓިސްއާއި އެއްގޮތަށް އަމަލުކޮށްފައިކަން މީރާއިން ހާމަކޮށްފައިވެއެވެ.

ދައުލަތަށް ދައްކަން ހުރި ފަރިސާ ހޯދުމަށް ކޯޓު މަރުހަލާގައި ހުރި މައްސަލަތަކުގެ ތެރެއިން މިދިޔަ އަހަރު 55 މައްސަލައެއް މީރާއާއި އެއްކޮޅަށް ނިމިފައިވާކަން މީރާއިން ފާހަގަކުރެއެވެ.

މީރާއިން އާންމުކޮށްފައިވާ މިދިޔަ އަހަރުގެ އަހަރީ ރިޕޯޓުގައި ދައުލަތައް ނުލިބިހުރި ފައިސާ ހޯދުމަށް ކޮށްފައިވާ މަސައްކަތްތަކުގެ ތަފްސީލް ވަނީ ހިމަނާފައެވެ.