ސްޕެއިންގެ ލަލީގާގެ ރައީސް ހަވިއަރ ޓެބަސް ވަނީ މިހާރު އެމެރިކާގައި ކުޅެމުންދާ 32 ޓީމުގެ ފީފާ ކުލަބު ވޯލްޑްކަޕް ހުއްޓުވާލުމަށް މަސައްކަތްކުރާނެ ކަމަށް ބުނެފައެވެ.

މި މުބާރާތުގައި ސްޕެއިންގެ ދެ ޓީމު ކަމަށްވާ އެޓްލެޓިކޯ މެޑްރިޑް އަދި ރެއަލް މެޑްރިޑް ވާދަކުރަމުން ދިޔަ ނަމަވެސް، ޓެބަސް ވަނީ މި އެއް މަސްދުވަހުގެ މުބާރާތް ކުރިއަށް އޮތް ތަނުގައި ނުބޭއްވުމަށް މަސައްކަތްކުރާނެ ކަމަށް ބުނެފައެވެ.

"އަޅުގަނޑުގެ މަޤްސަދަކީ އިތުރު ކުލަބު ވޯލްޑްކަޕެއް ނުބޭއްވުން، އެއީ ވަރަށް ސާފު" ކަމަށް ލަލީގާގެ އިވެންޓެއްގައި ޓެބަސް ބުނެފައިވެއެވެ.

މުބާރާތުގެ ފޯމެޓް ނުވަތަ ތާރީޚް ބަދަލުކޮށްގެން ރަނގަޅު ކުރެވިދާނެތޯ ނޫސްވެރިން ސުވާލުކުރުމުން، ޓެބަސް ވަނީ އޭނާގެ ވިސްނުން އިތުރަށް ސާފުކޮށްދީފައެވެ.

"ވަކި ބައެއްގެ ކުލަބުތަކަށާއި ކުޅުންތެރިންނަށް ފައިސާ ލިބޭ އިތުރު މުބާރާތެއްގެ ބޭނުމެއް ނެތް،" ޓެބަސް ބުނެފައިވެއެވެ.

"އަޅުގަނޑުމެންގެ ލީގުގައި އިތުރު ފައިސާއެއް ނެތް. އަޅުގަނޑުމެން މި ނިޒާމު ދެމެހެއްޓުމަށްޓަކައި މި މުބާރާތް ނައްތާލަން ޖެހޭ" ކަމަށް އޭނާ ވަނީ ފާހަގަކޮށްފައެވެ.

ޓެބަސްއަކީ ޚާއްސަކޮށް ބާސެލޯނާ އަދި ރެއަލް މެޑްރިޑް ފަދަ ލަލީގާގެ އެންމެ ބޮޑު ދެ ކުލަބާ ގުޅޭ ގޮތުން، މާލީ ކަންކަމާއި، ރެފްރީންގެ މައްސަލަތަކާއި، ޓީވީ ޙައްޤުތަކާއި އަދި ޖުމްލަކޮށް ފުޓްބޯޅައާ ގުޅޭ އެކި މައްސަލަތަކުގައި އަޑުއުފުލާ ފަރާތެއްގެ ގޮތުގައި ފާހަގަކުރެވެއެވެ.