ރާއްޖޭގައި މުޅިން އަލަށް ބާއްވާ އުރީދޫ ނޭޝަންގެ "އެޓޯލް އީ-ސްޕޯޓްސް ލީގު 2025" ގައި ރަޖިސްޓްރީވުމުގެ ފުރުޞަތު މިއަދު ހުޅުވާލައިފިއެވެ. މިއީ ރާއްޖޭގެ އެކި ކަންކޮޅުތަކުން ރަށްރަށުގެ ޓީމުތައް ބައިވެރިވެގެން ކުރިއަށްގެންދާ ޕަބްޖީ މުބާރާތެކެވެ.

އުރީދޫން ބުނެފައިވާ ގޮތުގައި، މި މުބާރާތުގައި ރަޖިސްޓްރީވުމުގެ ފުރުޞަތު ޖޫން 16 ވަނަ ދުވަހު ހުޅުވާލާފައިވާ ކަމަށާއި، މުބާރާތުގައި ބައިވެރިވުމުގެ ފުރުޞަތު އަންނަ ޖުލައި މަހުގެ 4 ވަނަ ދުވަހުގެ ނިޔަލަށް ހުޅުވާލެވިފައިވާ ކަމަށެވެ.

Ad by Hajj Corporation

މުބާރާތުގެ މަރުހަލާތައް

މި މުބާރާތަކީ މުޅިން އޮންލައިންކޮށް ކުރިއަށްގެންދާ މުބާރާތެއް ކަމަށާއި، ހަތަރު މަރުހަލާއަކަށް ބަހާލައިގެން ކުރިއަށްގެންދާނެ ކަމަށް އުރީދޫން މަޢުލޫމާތު ދީފައިވެއެވެ. މި މަރުހަލާތަކުގެ ތެރޭގައި އައިލެންޑް ކޮލިފައިންގ، ކުއާޓަރ ފައިނަލްސް، ސެމީ ފައިނަލްސް އަދި ގްރޭންޑް ފައިނަލްސް ހިމެނެއެވެ.

އިނާމުގެ ތަފްޞީލް

މުބާރާތުގައި ޖުމްލަ 50،000 ރުފިޔާގެ ފައިސާގެ އިނާމު ހިމެނެއެވެ. މީގެ ތެރެއިން ޗެމްޕިއަން ޓީމަށް 25،000 ރުފިޔާ، ރަނަރަޕް ޓީމަށް 12،000 ރުފިޔާ، ތިންވަނަ ޓީމަށް 6،000 ރުފިޔާ އަދި ހަތަރުވަނަ ޓީމަށް 3،000 ރުފިޔާ ލިބޭނެއެވެ. އަދި މުބާރާތުގެ އެމްވީޕީއަށް 4،000 ރުފިޔާ ލިބޭނެއެވެ.

މުބާރާތުގައި ބައިވެރިވާ ކޮންމެ ޓީމެއްގައި މަދުވެގެން ހަ ކުޅުންތެރިން ތިބެންޖެހޭނެ ކަމަށާއި، ކޮންމެ ޓީމަކަށްވެސް ރަށުން ބޭރުގެ ދެ ކުޅުންތެރިން ހިމެނިދާނެ ކަމަށް އުރީދޫން ބުނެފައިވެއެވެ. އެއް ރަށަކުން ގިނަ ޓީމުތަކެއް ބައިވެރިވާނަމަ، ޓީމު ނަންތަކުގައި ރަށުގެ ނަން ހިމަނަންޖެހޭނެއެވެ.

އުރީދޫން ފާހަގަކުރި ގޮތުގައި މިއީ ރާއްޖޭގެ އެކި ކަންކޮޅުތަކުގައި ތިބި ލޯކަލް ގޭމިންގ ކޮމިއުނިޓީތައް ފާހަގަކޮށް، ޒުވާނުންނާއި ޝައުޤުވެރިވާ ފަރާތްތަކަށް ފުރުޞަތުތައް ފަހިކޮށްދިނުމަށް ކުރާ މަސައްކަތުގެ ތެރެއިން އިތުރުކުރެވުނު މުހިންމު ބޮޅެކެވެ.