ކްލަބް ވޯލްޑް ކަޕްގެ ގްރޫޕް ޖީގައި މެންޗެސްޓަރ ސިޓީން ޔުވެންޓަސްއާ ވާދަކޮށް 5-2 އިން މޮޅުވެ، ގްރޫޕްގެ އެއްވަނަ ހޯދައިފިއެވެ. ކެމްޕިންގ ވޯލްޑް ސްޓޭޑިއަމްގައި ކުޅުނު މި މެޗުގައި ޕެޕް ގުއާޑިއޯލާގެ ޓީމުގެ ފަރާތުން ތަފާތު މޮޅުކުޅުމެއް ފެނިގެންގޮސްފައިވެއެވެ.

މެޗުގެ 9 ވަނަ މިނެޓްގައި ޖެރެމީ ޑޮކޫ ސިޓީއަށް ލީޑު ހޯދައިދިން ނަމަވެސް، އެޑަރސަންގެ ކުށަކުން ޓޫން ކޫޕްމައިނަރސް އޭގެ އިރުކޮޅެއް ފަހުން ވަނީ ގޯލެއް ޖަހައި ޔުވެންޓަސްއަށް މެޗު އެއްވަރު ކޮށްދީފައެވެ. ނަމަވެސް 26 ވަނަ މިނެޓްގައި ޔުވެންޓަސްގެ ޕިއޭ ކަލުލޫގެ އަތުން ބައިކޮޅަށް ވަނީ ގޯލެއް ވަދެފައެވެ.

ދެވަނަ ހާފުގައި ކުޅެން ނިކުތް އާލިންގ ހާލަންޑް ވަނީ 52 ވަނަ މިނެޓުގައި ޓީމުގެ ތިންވަނަ ލަނޑު ޖަހާފައެވެ. މިއީ ހާލަންޑްގެ ކެރިއަރުގައި ޖެހި 300 ވަނަ ގޯލެވެ. އަދި މީގެ އިތުރުން ބަދަލު ކުޅުންތެރިއެއްގެ ގޮތުގައި ނިކުތް ފިލް ފޯޑަން ވެސް ލަނޑެއް ޖަހާފައެވެ. ސިޓީގެ 5 ވަނަ ގޯލަކީ ސަވިންހޯގެ ރީތި ވަރުގަދަ ޝޮޓަކުން ޖެހި ގޯލެކެވެ.

މެޗުގައި ޔުވެންޓަސްގެ ދެވަނަ ގޯލު ޖަހައިދިނީ ވްލަހޮވިޗްއެވެ.

މި މޮޅާއެކު ސިޓީން ޖެހިގެން އޮތް ބުރުގައި ކުރިމަތިލާނީ ގްރޫޕް އެޗްގެ ދެވަނަ ޓީމު ސަޢޫދީގެ އަލް ހިލާލް އާއި ދެކޮޅަށެވެ.