މިދިޔަ ބުދަ ދުވަހު ކާށިދޫ ކަނޑަށް ބަންޑުން ޖަހައިލި، ސިވެކްގެ ލޭންޑިންގ ކްރާފްޓުން ގެއްލުނު ބިދޭސީ ފަޅުވެރިޔާ ވީކަމަށް ލަފާކުރެވެނީ މިހާރު ކަނޑުއަޑީގެ 550 މީޓަރު ފުނުގައި އޮތް ކޮޅުވެއްޓީގެ އިންޖީން ރޫމް ތެރޭގައި ކަމަށް އެމްއެންޑީއެފުން މިއަދު ބުނެފިއެވެ.

ބަންޑުންޖަހާލި ހާދިސާގައި ގެއްލުނު ބިދޭސީ މީހާ އަދިވެސް ނުފެންނާތީ ބޮޑަށް އޭނާ ހޯދުމުގެ މަސައްކަތް އެމްއެންޑީއެފްއިން ދަނީ ކުރަމުންނެވެ.

ތިން ސިފައިންނާއި، ދެ ބިދޭސީންނާއެކު ދަތުރުކުރި ސިވެކްގެ "އެލްސީ 308" ބަންޑުން ޖަހައިލީ، މާލެއިން ޅ. އަތޮޅަށް ދަތުރުކުރަމުން ދަނިކޮށެވެ. އެ ހާދިސާގައި ނިޔާވި ސިފައިންގެ މީހާގެ ހަށިގަނޑު ފެނުނީ ވީލްހައުސްތެރެއިން ކަމަށް ވެސް ސިފައިން ބުންޏެވެ.

އެމްއެންޑީއެފުން މިއަދު ބުނީ ގެއްލުނު ބިދޭސީ ފަޅުވެރިޔާ، އިންޖީނުރޫމް ތެރެއަށް ވަންކަން އެނގިފައިވާކަމަށެވެ.

މި ކޮޅުވެއްޓީގައި ހަ މީހުން ދަތުރު ކުރިއިރު، މި ހާދިސާގައި އެކަކު ވަނީ ނިޔާވެފައެވެ. ނިޔާވެފައި ވަނީ އެމްއެންޑީއެފްގެ ވޮރަންޓް އޮފިސަރު 2، އަލީ ހާމިދު އެވެ. އަލީ ޙާމިދު އަކީ ސިފައިންގެ ހިދުމަތުގައި 27 އަހަރު ވަންދެން އުޅުއްވާފައިވާ އޮފިސަރެކެވެ. ހާމިދުގެ ޖަނާޒާ ރަސްމީ އިއްޒަތުގައި ވަނީ ހުޅުމާލެ ސަހަރާގައި ބާއްވައިފަ އެވެ.