ގދ. ގައްދޫން ފުރައިގެން އެ ރަށާ ޖެހިގެން އޮންނަ ގަމަށް ދަތުރުކުރި 75 އަހަރުގެ ޒަކަރިއްޔާ މުޙައްމަދު ދަތުރުކުރި ޑިންގީ، ކަނޑުގެ އަޑިން މިއަދު ފެނިއްޖެއެވެ.

މޫސުން ގޯސްވެފައި ވަނިކޮށް އެކަނި ގައްދޫން ފުރައިގެން ގަމަށް ދަތުރުކުރި ޒަކަރިއްޔާ ގެއްލުނީ މިދިޔަ ބުރާސްފަތި ދުވަހުގެ ހެނދުނު 11:30 ހާއިރުއެވެ. އެ މައްސަލަ ފުލުހުންނަށް އެ ދުވަހުގެ ހަވީރު ހުށަހެޅުމާއެކު އެ ރަށު ކައުންސިލާއި ސިފައިން އަދި ފުލުހުން ގުޅިގެން ދަނީ ޒަކަރިއްޔާ ހޯދުމުގެ މަސައްކަތްކުރަމުންނެވެ.

Ad by Hajj Corporation

އެކަމާ ގުޅިގެން މީޑިޔާތަކަށް ސިފައިން މިއަދު ފޮނުވި މެސެޖެއްގައި ބުނީ، ޒަކަރިއްޔާ ހޯދުމުގެ އޮޕަރޭޝަންގައި މިއަދު ހެނދުނު ކުރި ދެވަނަ ޑައިވްގައި ގައްދޫ އާއި ގަމާ ދެމެދުގައި އޮންނަ ކަނޑުއޮޅީގެ 10 މީޓަރު އަޑިން އެ ޑިންގީ ފެނިފައިވާ ކަމަށެވެ.

އެޑައިވް ކޮށްފައި ވަނީ ސިފައިންނާއި ފުލުހުން ގުޅިގެން ކަމަށް ވެސް އެމްއެންޑީއެފުން ބުންޏެވެ.

މީގެ ކުރިން ސިފައިން ބުނި ގޮތުގައި، ޒަކަރިއްޔާ ހޯދުމަށް ކަނޑުމަގުން 2،307.99 އަކަ ނޯޓިކަލް މޭލު އަދި ވައިގެ މަގުން 3.،39 އަކަ ނޯޓިކަލް މޭލުގެ ސަރަހައްދެއް ބަލައިފައިވެއެވެ.

ފުލުހުން ބުނެފައިވާ ގޮތުގައި، ޒަކަރިއްޔާ އެންމެ ފަހުން ފެނުނުއިރު ލައިގެން ހުރީ ނޫ ކުލައިގެ ޓީޝާޓަކާއި ކަޅު ސޯޓެކެވެ. އޭނާ ދަތުރުކުރި ޑިންގީއަކީ ނޫކުލައިގެ ބާރިފަށެއް ދަމާފައިވާ ހުދުކުލައިގެ ޑިންގީއެކެވެ.