ފީފާ ކްލަބް ވޯލްޑް ކަޕްގެ ފައިނަލްގައި ޔޫރަޕްގެ ޗެމްޕިއަން ޕެރިސް ސެއިންޓް ޖަރމޭން (ޕީއެސްޖީ) ބަލިކޮށް ޗެލްސީ ތަށިއުފުލާލައިފިއެވެ. މިމެޗު ޗެލްސީއިން ކާމިޔާބުކުރީ 3-0 އިންނެވެ.

މެޗުގެ ފުރަތަމަ ހާފުގައި ޗެލްސީގެ ކޯލް ޕާމާ ވަނީ ދެ ލަނޑު ޖަހާފައެވެ. މިގޯލުތައް ޖަހާފައިވަނީ މެޗުގެ 22 ވަނަ މިނެޓާއި 30 ވަނަ މިނެޓުގައެވެ. މީގެ އިތުރުން ޗެލްސީއަށް އަލަށްގުޅުނު ބްރެޒިލްގެ ފޯވާޑް ޖޯ ޕެޑްރޯވެސް ވަނީ ފުރަތަމަ ހާފުގެ ފަހުފަގުތުކޮޅުގައި އިތުރު ގޯލެއްޖަހާފައެވެ.

Ad by Hajj Corporation

މެޗުގައި ދެ ޓީމުގެ ގޯލްކީޕަރުން ވަނީ ފާހަގަކޮށްލެވޭ ޕަފޯމަންސްތަކެއް ދައްކާފަ އެވެ. ޗެލްސީގެ ރޮބާޓް ސަންޗޭޒް ވަނީ ޕީއެސްޖީގެ ގިނަ ހަމަލާތަކެއް ހުއްޓުވައި، މެޗުގެ ނަތީޖާ ހިފެހެއްޓުމަށް މުހިންމު ދައުރެއް އަދާކޮށްފަ އެވެ. އެހެންމެ، ޕީއެސްޖީގެ ޖިއަންލުއިޖީ ޑޮންނަރުއްމާ ވެސް ވަނީ ޗެލްސީގެ ނުރައްކާތެރި ހަމަލާތަކެއް ހުއްޓުވާފައެވެ.

މެޗުގެ ފަހު މިނެޓުތަކުގައި ޕީއެސްޖީގެ ޖާއޯ ނެވޭސް އަށް ރަތް ކާޑު ދެއްކުމާ ގުޅިގެން، އެ ޓީމަށް މެޗު ނިންމާލަން ޖެހުނީ އެއް ކުޅުންތެރިއަކު މަދުންނެވެ. މުބާރާތުގެ އެންމެ މޮޅު ކުޅުންތެރިޔާގެ މަގާމު ހޯދީ ފައިނަލުގައި ދެ ލަނޑު ޖެހި ޗެލްސީގެ ކޯލް ޕާމާ އެވެ. މުބާރާތުގެ އެންމެ ގިނަ ގޯލުޖެހި ކޫލުންތެރިޔަކަށް ހޮވުނީ ރެއާލް މެޑްރިޑްގެ ގޮންޒާލޯ ގާސިއާއެވެ.

މިކާމިޔާބާއެކު ޗެލްސީން ދެވަނަ ފަހަރަށް ކްލަބް ވޯލްޑް ކަޕް ކާމިޔާބުކޮށްފައެވެ. ކުރިން މި މުބާރާތް ކާމިޔާބުކޮށްފައިވަނީ 2012 ވަނަ އަހަރު އެވެ. ފީފާއިން މިއަހަރު ވަނީ މުބާރާތުގެ ފޯމެޓް އައު ގޮތަކަށް ބަދަލުކޮށް، 32 ޓީމު ބައިވެރިކޮށްގެން ބޭއްވި ފުރަތަމަ މުބާރާތް ކާމިޔާބުކުރުމުގެ ޝަރަފު ޗެލްސީއަށް ލިބިފަ އެވެ. މިމުބާރާތް އެންމެ ގިނަ ފަހަރަށް ކާމިޔާބުކޮށްފައިވާ ރެއާލް މެޑްރިޑުން ވަނީ 5 ފަހަރު ތަށިއުފުލާލާފައެވެ.