ރާއްޖޭގެ ކުޅިވަރު ކުރިއެރުވުމަށް ޗައިނާއަށް ވެދެވޭނެ އެހީތެރިކަމާ ގުޅޭގޮތުން މަޝްވަރާ ކުރައްވައިފި
21 ޖުލައި 2025 - 07:45

ޗައިނާ ސަރުކާރުން ރާއްޖެއަށް އަލަށް ކަނޑައެޅުއްވި ސަފީރު، ހިޒް އެކްސެލެންސީ ކޮންގް ޝިންހުއާ އާއި ކުޅިވަރާއި ހަށިހެޔޮކަމާ ބެހޭ ވަޒީރު އަބްދުﷲ ރާފިޢު ބައްދަލުކުރައްވައި، ރާއްޖޭގެ ކުޅިވަރު ކުރިއެރުވުމަށް ޗައިނާއިން ވެދެވޭނެ އެހީތެރިކަމާ ގުޅޭގޮތުން މަޝްވަރާކުރައްވައިފިއެވެ.
ކުޅިވަރާއި ހަށިހެޔޮކަމާ ބެހޭ ވުޒާރާގައި ބޭއްވުނު މި ބައްދަލުވުމުގައި، ކުޅިވަރުގެ ރޮނގުން ދެ ގައުމުގެ ގުޅުން ވަރުގަދަކުރުމާއި، ކުޅިވަރުގެ ވަސީލަތްތައް ބިނާކުރުމާއި، ތަމްރީން ޕްރޮގްރާމްތަކާއި، ސްކޯލާޝިޕްގެ ފުރުސަތުތަކާ ގުޅޭގޮތުން މަޝްވަރާކުރެވުނެވެ. އަދި ކުޅިވަރުގެ ފަންނީ މީހުން ތަރައްޤީކުރުމާ ގުޅޭގޮތުންވެސް މަޝްވަރާކުރެވުނެވެ.

Ad by Hajj Corporation
ފުޖިއާން ޕްރޮވިންސްއިން ރާއްޖޭގެކުޅިވަރާބެހޭ ވަޒީރު އަބްދުﷲ ރާފިޢު އާއި ކުރެއްވި ބައްދަލުވުމުގެ ތެރެއިން
ބައްދަލުވުމުގައި ވަޒީރު ރާފިޢު ވަނީ ސަރުކާރުގެ ކުޅިވަރުގެ ތަސައްވުރާއި، ކުޅިވަރުގެ ދިގު ރާސްތާ ޕްލޭންގައި ސާކް ސަރަހައްދުން ބޭރުން ކާމިޔާބީ ހޯދަން ކުރައްވާ މަސައްކަތްތަކުގެ މައުލޫމާތު ސަފީރާ ހިއްސާކުރައްވާފައެވެ. ސަފީރު ކޮންގް ޝިންހުއާ ވަނީ ރާއްޖޭގެ ކުޅިވަރު ކުރިއެރުވުމަށް ސަރުކާރުން ކުރައްވާ މަސައްކަތްތަކަށް ފުރިހަމަ އެއްބާރުލުން ދެއްވާނެކަން ހާމަކުރައްވައި، ކުޅިވަރުގެ ރޮނގުން ދިވެހިރާއްޖެއަށް ބޭނުންވާ އެހީތެރިކަން ފޯރުކޮށްދެއްވާނެކަމަށް ވިދާޅުވެފައެވެ.
ފުޖިއާން ޕްރޮވިންސާއި ރާއްޖޭގެ ކުޅިވަރު ވުޒާރާއާ ދެމެދު ވެފައިވާ އެއްބަސްވުމުގެ ދަށުން، ކުރު މުއްދަތެއްގެ ތެރޭގައި ރާއްޖެއަށް ކުޅިވަރު ސާމާނު ހަދިޔާ ކުރެއްވުމަށް ހަމަޖެހިފައިވާކަން ވަޒީރު ފާހަގަކުރެއްވިއެވެ. މީގެ އިތުރުން، ދެފަރާތުގެ ދެމެދުގައި ޓްރޭނިންގ އެކްސްޗޭންޖް ޕްރޮގްރާމްތައް ކުރިއަށް ގެންދިއުމަށްވެސް އެއްބަސްވެވިފައިވާކަމަށް ދައުލަތުގެ މީޑިޔާ އާއި ވާހަކަދައްކަމުން ވަޒީރު ވިދާޅުވެފައިވެއެވެ.