25 އަހަރުގެ ތަޖުރިބާއާއެކު ވަޑައިގެންނެވި މޭޔަރަށް އޮޑިޓްކުރަންޖެހޭކަންވެސް ނޭނގެނީތޯ؟
23 ޖުލައި 2025 - 11:19

މާލޭ ސިޓީ ކައުންސިލްގެ 4 ވަނަ ދައުރުގެ 204 ވަނަ ޖަލްސާގައި ލޭ ސިޓީގެ މައްޗަންގޯޅި މެދު ދާއިރާގެ ކައުންސިލަރު ފާތިމަތު އިޝާން ޢަލީ ކުރެއްވީ މިހާރު ރައްޔިތުން މާލޭގެ މޭޔަރު އާދަމް އާޒިމްގެ އަރިހުން ޖަވާބު ހޯދުމަށް ބޭނުންވާ އެންމެ ބޮޑު ސުވާލެވެ. ނަމަވެސް ފެނިގެންދިޔައީ މި ސުވާލާއި އެކު މާލޭގެ މޭޔަރު އާޒިމްގެ "އަނގަ ބެދުނު" ތަނެވެ. އިޝާން އަށް ދެއްވީ ވެސް ޒިންމާދާރުކަން ކުޑަ ޖަވާބެކެވެ.
މާލޭ ސިޓީ ކައުންސިލްގެ މިލްކުވެރިކަމުގައި ހުރި ބިންތަކެއް ނުއަގުގައި އެކިއެކި ފަރާތްތަކަށް މޭޔަރު އާޒިމް ދޫކުރައްވަމުން ދާތީ ފާޑުކިޔުން ބޮޑުވެފައިވަނިކޮށް އެކަން ކުރީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ މޭޔަރު ކަމުގައިކަމަށް ދޭހަވާ މޭރުމުން މޭޔަރު އާޒިމް އަންނަނީ ތަކުރާރުކޮށް ވިދާޅުވަމުންނެވެ. ރައްޔިތުންގެ ފަރާތުން އިޝާން ޖަވާބު ހޯދަން ބޭނުންވީ މާލޭގެ މޭޔަރުކަމާ ހަވާލުވީިއިރު އޮޑިޓެއް ހެއްދެވިންތޯއެވެ.

Ad by Hajj Corporation
"މޭޔަރ ސިޓީ ކައުންސިލާ ހަވާލުވީއިރު އޮޑިޓެއް ހެއްދެވިންތޯ؟"
އިޝާންއަށް ދެއްވި ޒިންމާދާރުކަން ކުޑަ ޖަވާބުގައި އާޒިމް ވިދާޅުވީ އޭނާއަކީ އޮޑިޓަރެއް ނޫންކަމަށެވެ.
"އަޅުގަނޑަކީ އޮޑިޓަރެއް ނޫން. މިތަނަށް އައީ ތަން ހިންގަން".
ސުވާލަށް ޖަވާބު ސީދާ ނުދެއްވާތީ އިޝާން ތަކުރާރުކޮށް އަނެއްކާވެސް އެއްސެވީ މޭޔަރ ސިޓީ ކައުންސިލާ ހަވާލުވީއިރު އޮޑިޓެއް ހެއްދެވިންތޯއެވެ. އަދި ސުވާލު ކުރަނީ އާޒިމް އަކީ އޮޑިޓަރަކަށް ވެގެން ނޫންކަމަށާއި ތަނަކާ ހަވާލުވާއިރު ތަން އޮތް ހާލަތު އެނގެންޖެހޭނެތީކަމަށެވެ.
" އެއްވެސް ތަނަކާ މީހަކު ހަވާލުވާއިރުތަން އޮތް ހާލަތު ދެނެގަނެފައޭ ހަވާލުވާނީ އާއްމުގޮތެއްގައި. އެކަން ކުރެއްވިންތޯއޭ".
ރައްދުގައި އާޒިމް ވިދާޅުވީ ކުރިން މާލޭގެ މޭޔަރއަކަށް ހުންނެވި ރައީސް މުއިއްޒު ލިޔެކިޔުންތައް އޭނާ އާ ހަވާލުކޮށްފައިނުވާކަމަށެވެ. އަދި އެއަށްފަހު އިޝާންއަށް ފުރުސަތުވެސް ނުދެއްވައި ބައްދަލުވުން ނިންމާލެއްވީއެވެ.
ރައީސް ޑރ މުޙައްމަދު މުޢިއްޒުގެ މޭޔަރުކަމުގެ ދުވަސްވަރުގެ ބޮލުގައި އަޅުވާފައި، މާލޭގެ ބިންތައް ނުއަގުގައި ދިގު މުއްދަތަށް ދޭކަމަށް އާޒިމްގެ މައްޗަށް އެންމެ ފުރަތަމަ ތުހުމަތު ކުރެއްވީ ގަލޮޅު އުތުރު ދާއިރާގެ ކައުންސިލަރު ސައިފް ފާތިހުއެވެ. މާލެ ސިޓީއިން ކުރު އަދި ދިގު މުއްދަތަށް ކުއްޔަށް ދޫކޮށްފައިވާ ބިންބިމުގެ ތަފްޞީލު ހޯދަން މީގެ ކުރިން ތަކުރާރުކޮށް އެދުމުންވެސް ވިސްނަވަމުންދާކަމަށް ބުނެ ކައުންސިލަރުންނަށް އެ މައުލޫމާތު ނުދީ އާޒިމްދަނީ ހިފަހައްޓަމުންނެވެ. ކައުންސިލް ބައްދަލުވުމަކުން ފާސްކޮށްގެން ނޫނީ ބިންތައް ދޫނުކުރެވޭ ގޮތް ހެދުމަށް 2023 ވަނަ އަހަރު ހުށަހެޅި ހުށަހެޅުން ބޮލާލާ ޖެހުމަށްފަހު އާޒިމްދަނީ ހިތު ހުރިގޮތަކަށް ކަންކުރަމުންނެވެ. އުޒުރު ދެއްކުން ދޫކޮށް ސިޓީ ކައުންސިލްގެ މިލްކުވެރިކަމުގައި ހުރި ބިންބިމާއި އެބިންބިމުގެ ސައިޒާއި، ވަކިކަމަކަށް ހާއްސަކޮށްފައިވާނަމަ އެބޭނުމަކާއި ނުވަތަ ކުއްޔަށް ދީފައިވާނަމަ އެއީ ކޮން ކަމަކަށް ކާކަށް ކޮން ކުއްޔެއްގައިކަން އެނގޭނެހެން އަންގައިދިނުމަށް ކައުންސިލަރުން ދަނީ އެދެމުންނެވެ.
އިޝާން ވިދާޅުވީ ދެފުއްފެންނަ ގޮތަކަށް ކައުންސިލް ހިންގަމުންދާކަމަށް މީޑިއާތަކުގެ ކުރިމަތީގައި އަޑުން އަޑުނަގައި ވާހަކަދައްވަމުން ގެންދަވާއިރު ވަރަށް އާދައިގެ ސުވާލެއް ކޮށްލުމުންވެސް ދެއްވީ ވަރަށް ޒިންމާދާރުކަން ކުޑަ ޖަވާބެއްކަމަށެވެ . މީގެ އިތުރުން މާލޭގެ މޭޔަރުކަމުގައި ކުރިން ހުންނެވި ރައީސް މުއިއްޒު ވަކިވެވަޑައިގެންނެވުމަށްފަހު ކައުންސިލްގެ ހުރިހާކަމެއް ކަރުދާހުގައި ލިޔެ "ތަބަކަށް ލައިގެން" އާޒިމްއާ ހަވާލުކުރުމަކީ ކުރަންޖެހޭކަމެއްތޯވެސް އިޝާން ވަނީ ސުވާލު އުފައްދަވާފައެވެ.އާޒިމްގެ ހަމައިން ބަލާކަމުގައިވާނަމަ އެމްޑީޕީ ސަރުކާރުގައި ސަރުކާރު ކުންފުނިތަކުގެ އެމްޑީންނަށް ތިބި މީހުން ސަރުކާރު ބަދަލުވުމުން މި ސަރުކާރުގެ އެމްޑީންނާ ލިޔެކިޔުންތައް ހަވާލުނުކުރީ ކީއްވެތޯއެެވެ؟
ދެން ތި ދައްކަވަނީ ކުރީގެ މޭޔަރުގެ ވާހަކަ ނުވަތަ ކުރީ ސިޓީ ކައުންސިލްގެ ވާހަކައެވެ. ކުރީ ކައުންސިލަރުންގެ ވާހަކައެވެ. ބަލަ ކުރީ ސަރުކާރޭ ނުކިޔަން އެންމެ ބޮޑަށް ވަކާލާތުކުރައްވައި، އެމްޑީޕީ ސަރުކާރުން ހިންގާފައިވާ ކޮރަޕްޝަނާއި ފަސާދައިގެ ވާހަކައާއި ގައުމުގެ މާލީ ހާލަތު ފުނޑާލި ވާހަކަ ދައްކާތީ މި ސަރުކާރު ބޭފުޅުންނަށް އެނގޭނީ "ކުރީ ސަރުކާރު، ކުރީ ސަރުކާރޭ" ކިޔަންކަމަށް ބުނީވެސް ހަމަ ތިބޭފުޅުންނޫންތޯއެވެ. މިއަދު ހަމަ ކުރީ މޭޔަރާއި ކުރީ ކައުންސިލްގެ ބޮލުގައި އަޅުވާފައި ކޮންމެ ފަދަ ވައްކެއްކުރިޔަސް އޯކޭވީތޯއެވެ.
މީގެ ކުރިން މާލެ ސިޓީގެ މޭޔަރުގެ މަގާމަށް އާޒިމް ވަޑައިގެންނެވި ފަހުން ސިޓީ ކައުންސިލަށް ބޮޑު މުސާރާގައި ކޮންސަލްޓަންޓުން ނެގިކަންވެސް ފަޅާއެރިއެވެ. އޮކްޓޯބަރު 13، ގައި އިދިކޮޅު އެމްޑީޕީން ހދ. ކުޅުދުއްފުށީގައި ކުރިއަށް ގެންދިޔަ ލާމަރުކަޒީ ގުޅުން ކޮންފަރެންސްގައި ވާހަކަ ދައްކަވަމުން އާޒިމް ވިދާޅުވީ މޭޔަރު ކަމަށް ވަޑައިގެންނެވި ފަހުން 15 ކޮންސަލްޓަންޓުން ނެންގެވި ކަމަށެވެ. އަދި އެއީ ހުސްވެސް އަމިއްލަފުޅު ޕާޓީ- އެމްޑީޕީގެ ބޭފުޅުންކަމަށް ވަނީ ލައިވް ޓީވީގައި އިއުތިރާފުވެވަޑައިގެންފައެވެ.
މިވާހަކަތައް ތަކުރާރުކޮށް ދައްކަމުން އަންނާތީ ބައެއް ކައުންސިލަރުންނަށް މަސައްކަތަށް ދަތިކޮށް އެކި ފިއްތުންތައް ކުރިމަތިކުރަމުންދާ ވާހަކަވެސް އަޑުއިވެއެވެ. މާލޭ ސިޓީ ކައުންސިލަކީ ޒިންމާދާރުކަން ބޮޑު މަސައްކަތްތަކެއްކުރަން މަތިކޮށްފައިވާ އިދާރާއެއްކަމަށް ވީއިރު ރޯމާދުވާލު މާލޭގެ ބިންތައް ނުއަގުގައި ބަހާލާއިރުވެސް ވީ އެއްޗެކޭ ނުބުނެ ހުންނަންތޯއެވެ؟