މީގެ ދެ އަހަރު ކުރިން 2022 ވަނަ އަހަރުގެ އޮކްޓޯބަރު މަހު ބައިސްކަލެއް ވަަގަށް ނެގި މީހަކު ތިން މަހަށް ޖަލަށް ލާން ކްރިމިނަލް ކޯޓުން މިއަދު ހުކުމް ކޮށްފި އެވެ.

ބައިސްކަލެއް ވަގަށް ނެގި ކަމުގެ ކުށުގެ ދައުވާ އިފުލާފައިވަނީ، ކ. ތުލުސްދޫ، އުދުހޭކޮކާ، އަބްދުލް މަޖީދު އަބްދުﷲ ގެ މައްޗަށެވެ.

Ad by Hajj Corporation

އަބްދުﷲ އެ ބައިސްކަލު ވަގަށް ނަގާފައިވަނީ އަމީރުއަހުމަދު މަހުގައި ހުންނަ ކޮމާޝަލް ބޭންކުގެ ކުރިމަތީގައި ބަހައްޓާފައި ހުއްޓައެވެ. ޝަރީއަތުގެ އަޑުއެހުމުގައި އޭނާ ބުނި ގޮތުގައި އެ ބައިސްކަލް ނެގީ ތަޅުނުލާ އެތަނުގައި ބަހައްޓާފައި ހުރުމުން ދުއްވާލުމަށެވެ.

އަބްދުﷲ ގެ މައްޗަށް ވަނީ ޖުނަހުގެ 1 ވަނަ ދަރަޖައިގެ ކުށެއް ކަމަަށް ސާބިތުވެފައެވެ. މި ކުށުގެ އަދަބަކީ 4 މަހާއި 24 ދުވަހުގެ މުއްދަތަކަށް ޖަލަށް ލުމެވެ. އެހެން ނަމަވެސް އޭނާ ކުށަަށް އިއުތިރާފްވެފައިވާތީ، އޭނާގެ މައްޗަށް އައި ކުށުގެ އަދަބަކީ 3 މަހާއި 18 ދުވަހުގެ މުއްދަތަކަށް ޖަލަށްލުން ކަމަށް ކުރިމިނަލް ކޯޓުން ވަނީ ފާހަގަކޮށްފައެވެ.

މިމައްސަލައިގައި އޭނާ މީގެ ކުރިން ބަންދުކޮށްފައި ނުވާތީ މި ހުކުމް އޭނާގެ މައްޗަށް ތަންފީޒުކުރާނެއެވެ.