ބޯޓެއްގައި މަސައްކަތްކުރި ބަންގްލަދޭޝްގެ ރައްޔިތެއް ކަމަށްވާ ލިޓަން މަރާލިކަން ސާބިތުވެ، ގދ. ފަރެސްމާތޮޑާ، އޮރިއަން، މުހައްމަދު ނިޒާމް 25 އަހަރަށް ޖަލަށްލުމަށް ކްރިމިނަލް ކޯޓުން މިއަދު ހުކުމްކޮށްފިއެވެ. މިއީ ރާއްޖޭގައި މީހަކު ގެއްލިފައިވާ މައްސަލައެއްގައި މަރުގެ ދައުވާ ސާބިތުވި ފުރަތަމަ ފަހަރުކަން ފާހަގަކޮށްލެވެއެވެ.

ނިޒާމްގެ މައްޗަށް ދައުލަތުން އުފުލާފައިވަނީ އިންސާނެއްގެ ފުރާނައަށް ފަރުވާލެއް ނެތި ކުރި ކަމަކުން މީހަކު މަރުވުމުގެ ކުށުގެ ދައުވާއެވެ. މި މައްސަލައިގައި ކޯޓުން ކުރި ހުކުމުގައިވާ ގޮތުން، ޖަލު ހުކުމުން ބަންދުގައި މިހާތަނަށް ހޭދަކުރި މުއްދަތު އުނިކުރުމުން، އޭނާ ދެން ތަންފީޒު ކުރަންޖެހޭނީ 21 އަހަރާއި 10 މަހުގެ ޖަލު ހުކުމެކެވެ.

Ad by Hajj Corporation

މަރުގެ ދައުވާގެ އިތުރުން، ނިޒާމްގެ މައްޗަށް ވައްކަމާއި މަސްތުވާތަކެތީގެ ދައުވާ ވެސް ވަނީ ސާބިތުވެފައެވެ. މި ހާދިސާ ހިނގާފައިވަނީ މީގެ ދުވަސްތަކެއް ކުރިން ދަތުރުކުރި ބޯޓެއްގެ ތެރޭގައެވެ. ލިޓަން ގެއްލުނު މައްސަލައިގައި ނިޒާމްގެ މައްޗަށް ތުހުމަތު ކުރެވި، އޭނާ ހައްޔަރުކޮށް ޝަރީއަތް ކުރިއަށް ގެންގޮސްފައިވަނީ ގިނަ ހެކިތަކަކާއެކުގައެވެ.

މިއަދުގެ ހުކުމަކީ ރާއްޖޭގެ ޝަރުއީ ނިޒާމުގައި މީހަކު ގެއްލިފައިވާ ހާލަތެއްގައި، އެމީހަކު މަރާލިކަން ސާބިތުކޮށް ހުކުމް އިއްވި ތާރީޚީ މައްސަލައެކެވެ. މި މައްސަލައިގެ ތަހުގީގަށްފަހު ދައުލަތުން ވަނީ ނިޒާމާ ދެކޮޅަށް ވަރުގަދަ ހެކިތަކެއް ހުށަހަޅާފައެވެ.