ޗީފް ޖަސްޓިސް ރިޓަޔަރޑް އަލްއުސްތާޛް އަޙްމަދު މުއުތަޞިމް ޢަދުނާނަށް ނިޝާން ޢިއްޒުއްދީންގެ ޢިއްޒަތުގެ ވެރިކަން، ރައީސުލްޖުމްހޫރިއްޔާ އަރުވައިފިއެވެ.

މިނިވަންދުވަހުގެ ރަސްމީ ޖަލްސާގައި މި އިއްޒަތް މިއަހަރު ތިން ބޭފުޅަކަށް އެރުވުމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވަނީ ކަނޑައަޅުއްވާފައެވެ. އެގޮތުން އެ ލަގަބު އެރުއްވި އެއް ބޭފުޅަކީ، މިމަހު ރިޓަޔާކުރެއްވި އުއްތަމަ ފަނޑިޔާރު، އަލްއުސްތާޛް އަޙްމަދު މުއުތަޞިމް ޢަދުނާނެވެ.

އެމަނިކުފާނުވަނީ، ރާއްޖޭގެ ޝަރުޢީ ދާއިރާއަށާއި ގާނޫނީ ދާއިރާއަށް މީހުން ބިނާކުރެއްވުމަށާއި، ޝަރުޢީ ދާއިރާގެ ކަންކަން ހަރުދަނާކުރެއްވުމަށާއި، ރާއްޖޭގެ ޚާރިޖީ ދާއިރާއާ ގުޅޭ ކަންކަމުގައި ގާނޫނީ ގޮތުން ދެއްވަންޖެހޭ ލަފާދެއްވާ، ގިނަގުނަ ޚިދުމަތްތަކެއްކުރައްވާފައެވެ. ނިޝާން އިއްޒުއްދީންގެ އިއްޒަތުގެ ވެރިޔާގެ ލަގަބު އަރުވާފައި ވަނީ އެ ޚިދުމަތްތަކުގެ އަގު ވަޒަންކުރެއްވުމުގެ ގޮތުންނެވެ.

މުއުތަސިމް ވަނީ އުއްތަމަ ފަނޑިޔާރުގެ ހައިސިއްޔަތުންނާއި ސުޕްރީމް ކޯޓުގެ ފަނޑިޔާރެއްގެ ހައިސިއްޔަތުން ނުވަ އަހަރާއި ހަތް މަހާއި 12 ދުވަހު ޝަރުޢީ ދާއިރާއަށް ޚިދުމަތް ކުރައްވާފައެވެ.

މުއުތަސިމް އުއްތަމަ ފަނޑިޔާރު ކަމަށް ވަޑައިގަތީ، ކުރީގެ ރައީސް އިބްރާހީމް މުޙައްމަދު ޞާލިޙްގެ ވެރިކަމުގައި ޑިސެންބަރު 8، 2019ގައެވެ.