އަންހެނުންގެ ލޯންގްކޯސް 100 މީޓަރ ބެކްސްޓްރޯކް އިވެންޓުގެ ޤައުމީ ރެކޯރޑް އަމްނާ ތަޒްކިޔާ މިރުޞާދު އާކޮށްފިއެވެ. ސިންގަޕޫރުގައި މިހާރު ކުރިއަށްދާ 22 ވަނަ ވޯލްޑް އެކުއަޓިކްސް ޗެމްޕިއަންޝިޕްސްގައި ތަޒްކިޔާ މި ރެކޯޑު އާކޮށްފައިވަނީ 01:13.49 އިން ރޭސް ނިންމައިގެންނެވެ.

މި އިވެންޓުގެ ކުރީގެ ޤައުމީ ރެކޯޑު އޮތީ ހަމްނާ އަޙްމަދުގެ ނަމުގައެވެ. އޭނާ މި ރެކޯޑު ހާސިލުކޮށްފައިވަނީ މިދިޔަ 2024 ވަނަ އަހަރު މެލޭޝިއާގައި ބޭއްވުނު 59 ވަނަ މައިލޯ/އެމް.އޭ.އެސް މެލޭޝިއާ އިންވިޓޭޝަނަލް އޭޖްގްރޫޕް ސްވިމިންގ ޗެމްޕިއަންޝިޕްސްގައި 01:17.69 އިން އިވެންޓު ފުރިހަމަކޮށްގެންނެވެ.

Ad by Hajj Corporation

މީގެއިތުރުން ފެތުންތެރިޔާ މިރާލް ޢައިން ލަތީފްވެސް އިއްޔެ ވަނީ އަންހެނުންގެ ލޯންގކޯސް 200 މީޓަރު އިންޑިވިޖުއަލް މެޑްލޭ އިވެންޓުގެ ޤައުމީ ރެކޯޑު އާކޮށްފައެވެ.

މިރާލް މި އިވެންޓު ނިންމާފައިވަނީ 2 މިނެޓާއި 44.34 ސިކުންތުންނެވެ. މި އިވެންޓުގެ ކުރީގެ ޤައުމީ ރެކޯޑު ވެސް އޮތީ މިރާލްގެ އަތުގައެވެ. އެ ރެކޯޑު މިރާލް ހާސިލުކޮށްފައިވަނީ މިއަހަރުގެ ކުރީކޮޅު އިނގިރޭސިވިލާތުގައި ބޭއްވުނު ޑެވަން ކައުންޓީ ޗެމްޕިއަންޝިޕްސްގައެވެ. އެ މުބާރާތުގައި މިރާލް ރޭސް ނިންމާފައިވަނީ 2 މިނެޓާއި 45.93 ސިކުންތުންނެވެ.