ހަންގޭރީގައި ކުރިއަށްދިޔަ އެޤައުމުގެ 127 ވަނަ ނެޝަނަލް ޗެމްޕިއަންޝިޕްސްގައި ދިވެހި ފެތުންތެރިޔާ ޙަމްނާ އަޙުމަދު އަންހެނުންގެ ލޯންގކޯސް 200 މީޓަރ ބްރެސްޓް ސްޓްރޯކް އިވެންޓުގެ ޤައުމީ ރެކޯރޑް އާކޮށްފިއެވެ.

ޙަމްނާ މިރެކޯރޑް އާކޮށްފައިވަނީ 03:03.69 ގައި ރޭސް ފުރިހަމަކޮށްގެންނެވެ. މިއީ ކުރީގެ ރެކޯރޑަށްވުރެ ގާތްގަނޑަކަށް 1 ސިކުންތު އަވަސް ވަގުތެކެވެ.

މި އިވެންޓުގެ ޤައުމީ ރެކޯރޑް އެންމެ ފަހުން އާކޮށްފައިވަނީ އައިޝަތު ސާޖިނާއެވެ. އެއީ، 2019 ވަނަ އަހަރު ބޭއްވުނު 18 ވަނަ ފީނާ ވޯލްޑް ސްވިމިންގ ޗެމްޕިއަންޝިޕްސްގައި 03:04.53 އިން ރޭސް ފުރިހަމަކޮށްގެންނެވެ. މިހާރު ޙަމްނާ މިވަނީ އެ ރެކޯރޑް ވެއްޓުވާލާފައެވެ.

ޙަމްނާގެ މި ކާމިޔާބީއާއެކު، އޭނާ މިހާރު ވަނީ އަންހެނުންގެ ލޯންގްކޯސް 100 މީޓަރު އަދި 200 މީޓަރު ބްރެސްޓްސްޓްރޯކް އިވެންޓުގެ ޤައުމީ ރެކޯރޑު ހޯދާފައެވެ. މިއީ ދިވެހި ފެތުންތެރިންގެ ތެރެއިން ޙަމްނާގެ ހުނަރާއި ޤާބިލުކަން ދައްކުވައިދޭ ފާހަގަކޮށްލެވޭ ކާމިޔާބީއެކެވެ.

ޙަމްނާގެ މި ކާމިޔާބީއަކީ ދިވެހި ފެތުމުގެ ކުޅިވަރަށް ލިބުނު ބޮޑު ކުރިއެރުމެއްކަމަށް ބެލެވެއެވެ. އަދި މިކަމަކީ ޤައުމީ ފެންވަރުގައި އަދި ބައިނަލްއަޤްވާމީ މުބާރާތްތަކުގައި ދިވެހި ފެތުންތެރިންނަށް އިތުރު ހިތްވަރެއް ލިބިގެންދާނެ ކަމެކެވެ.