ރީޖަނަލް އެއާޕޯޓްސް ކޮމްޕެނީ ލިމިޓެޑް (އާރްއޭސީއެލް)ގެ މެނޭޖިން ޑިރެކްޓަރުގެ މަގާމުން އަހުމަދު މުބީން، އެ މަގާމުން އިސްތިއުފާ ދެއްވައިފި އެވެ.

މުބީން މަގާމުން އިސްތިއުފާ ދެއްވި އިރު އާރްއޭސީއެލް އާއި އެމްއޭސީއެލް އެއްކޮށްލުމަށް ރައީސުލްޖުމްހޫރިއްޔާ ވަނީ ނިންމަވާފައެވެ.

ރީޖަނަލް އެއާޕޯޓްސް ކޮމްޕެނީ ހިންގަމުން އައި ހ.ސުވެއިސް އިމާރާތުގެ 3 ފަންގިފިލާވެސް މިހާރު ވަނީ ދޫކޮށްލާފައެވެ. އެމްއޭސީއެލްއާއި އާރުއޭސީއެލް އެއްކޮށްލަނީ ހަރަދު ކުޑަ ކުރުމަށް ސަރުކާރުނ ްއަޅާފައިވާ ފިޔަވަޅުގެ ތެރެއިންނެވެ. އާރުއޭސީއެލް ހިންގަމުން އައި 3 ފަންގިފިލާއަށްވެސް މަހަކު 4 ލައްކަ ހަތްދިހަ ހާސް ރުފިޔާ ދައްކަންޖެހެއެވެ.

އެމްއޭސީއެލްއާއި އާރްއޭސީއެލް އެއްކޮށްލާ އެ ކުންފުނީގައި ތިބި މުވައްޒަފުން މިހާރު އެމްއޭސީއެލްއަށް ނިކުންނަން ފަށާފައިވާ ކަމަށް މައުލޫމާތު ލިބެއެވެ.

އެސްއޯއީ ރިފޯމް މަސައްކަތްތަކުގެ ދަށުން ރީޖަނަލް އެއަރޕޯޓްސް ކޮމްޕެނީ އެމްއޭސީއެލްގެ ދަށަށް ބަދަލުކުރަން ނިންމާ އެކަން ކެބިނެޓަށް ރައީސް ހުށަހަޅުއްވާފައި ވަނީ މިދިޔަ އަހަރުގެ ސެޕްޓެމްބަރު މަހުގެ ތެރޭގައެވެ.

އޭރު ރައީސް ޑރ. މުހައްމަދު މުއިއްޒު ވިދާޅުވީ އެއީ ރީޖަނަލް އެއަރޕޯޓްސް ކުންފުންޏަށް އެންމެ ފައިދާވާނެގޮތްކަމަށް ދެކެވަޑައިގަންނަވާ ކަމަށެވެ.

މީގެއިތުރުން ފަހިދިރިއުޅުން ކޯޕަރޭޝަން (އެފްޑީސީ) ހައުސިން ޑިވެލޮޕްމަންޓް ކޯޕަރޭޝަން، (އެޗްޑީސީ)ގެ ދަށަށް ބަދަލުކުރުމާ ގުޅޭގޮތުންވެސް މަޝްވަރާކުރައްވާނެކަމަށް ރައީސް ވިދާޅުވިއެވެ. މީގެ އިތުރުން ފަންޑު މެނޭޖުމަންޓް ކޯޕަރޭޝަން، ބިޒްނަސް ސެންޓަރ ކޯޕަރޭޝަން އަދި ބިޒްނަސް ސެންޓާ ކޯޕަރޭޝަން (ބީސީސީ)ގެ ދަށަށް ބަދަލުކުރުން ނުވަތަ އެއްކޮށްލުމަށް މަޝްވަރާކުރައްވާ ގޮތެއް ނިންމަވާނެކަމަށްވެސް ރައީސް ވިދާޅުވިއެވެ.