މާލެ ސިޓީ ކައުންސިލުން ކުއްޔަށް ދޫކޮށްފައިހުރި ބިންތައް ކުއްޔަށް ދޫކޮށްފައިހުރީ، ކޮންބަޔަކަށް، ކޮންބޭނުމަކު، ކޮން ކުއްޔަކަށް، ކިހާ މުއްދަތަކަށްކަން، ކުރިޔަށް އޮތް މަހެއްހާ ދުވަހުގެތެރޭ ހާމަކުރަމުން ގެންދާނެކަމަށް ކައުންސިލުން ބުނެފިއެވެ.

މާލޭގެ މޭޔަރު އާދަމް އާޒިމާއި ގަލޮޅު އުތުރު ދާއިރާގެ ކައުންސިލަރު ސައިފް ފާތިހުގެ ކޯޅުމުގެ ތެރެއިން މާލޭ ސިޓީ ކައުންސިލްގެ މިލްކުވެރިކަމުގައި ހުރި ބިންތަކެއް އާޒިމު ނުއަގުގައި އެކިއެކި ފަރާތްތަކަށް ދޫކުރާ ކަމަށް ބުނެ ސައިފް ވަނީ ތުހުމަތުތަކެއް ކުރައްވާފައެވެ.

އެއާއެކު ސިޓީ ކައުންސިލްގެ ރައްޔިތުންގެ ބައްދަލުވުމުގެ ތެރެއިން މޭޔަރު އާދަމް އާޒިމް ވިދާޅުވީ ކުރިން ކުއްޔަށް ދޫކޮށްފައި ހުރި ބިންތަކުގެ އެއްބަސްވުމުގެ މުއްދަތު ހަމަވެގެން، މުއްދަތު އިތުރުކުރަން އެދޭ ހާލަތްތަކުގައި ވެސް، ޢަމަލުކުރާނެގޮތެއް ނިންމަމުން ކައުންސިލް ތަޅުމަށް ހުށަހަޅައި، މަޝްވަރާގެ ރީތި އުސޫލުންކަންކުރުމަށް މަސައްކަތް ކުރަމުންދާކަަމަށެވެ.

މާލެ ސިޓީއިން ކުރު އަދި ދިގު މުއްދަތަށް ކުއްޔަށް ދޫކޮށްފައިވާ ބިންބިމުގެ ތަފްޞީލު ހޯދަން މީގެ ކުރިން ތަކުރާރުކޮށް އެދުމުންވެސް ވިސްނަވަމުންދާކަމަށް ބުނެ އެ މައުލޫމާތު ނުދޭކަމަށް ސައިފް ވަނީ މީގެ ކުރިން ބުނެފައެވެ.

ކައުންސިލް ބައްދަލުވުމަކުން ފާސްކޮށްގެން ނޫނީ ބިންތައް ދޫނުކުރެވޭ ގޮތް ހެދުމަށް 2023 ވަނަ އަހަރު ހުށަހެޅި ހުށަހެޅުން ބޮލާލާ ޖެހުމަށް ފަހު ނުއަގުގައި މާލޭގެ ބިންތައް ދިގު މުއްދަތަކަށް އާޒިމް ދޫކުރައްވަމުން ގެންދަވާ ކަމަށްވެސް ސައިފް ތުހުމަތު ކުރައްވާފައިވެއެވެ.