ދުނިޔޭގެ ޞިއްޙަތު ޖަމުޢިއްޔާ (ޑަބްލިއުއެޗްއޯ) އިން ކޮންމެ އަހަރަކު ބާއްވާ ވޯލްޑް ހެލްތު އެސެމްބްލީގެ ތެރެއިން ދެމުން އަންނަ އެވޯޑްތަކަށް ކުރިމަތިލުމުގެ ފުރުޞަތު ދިވެހިން ވެސް ހިމެނޭހެން އެޖަމިއްޔާގެ ހުރިހާ މެންބަރު ގައުމުތަކަށް ހުޅުވާލައިފިއެވެ.

މި އެވޯޑްތަކަށް ކުރިމަތިލެވޭނީ ކޮންމެ މެމްބަރު ޤައުމަކުން އެންމެ ފަރާތަކަށެވެ. އެވޯޑަށް ހޮވުމުގައި އެފަރާތްތަކުން ކޮށްފައިވާ މަސައްކަތްތަކާއި ހުށަހަޅާ ލިޔެކިޔުންތަކަށް ރިޢާޔަތްކުރެވޭނެކަމަށް ވަނީ ބަޔާންކޮށްފައެވެ.

އެވޯޑްތަކާ ބެހޭ އިތުރު މަޢުލޫމާތާއި އެޕްލިކޭޝަން ފޯމް ޑަބްލިއުއެޗްއޯގެ ވެބްސައިޓުން ލިބެން ހުންނާނެ ކަމަށް މިނިސްޓްރީން މަޢުލޫމާތުދެއެވެ. 

މިގޮތުން ހުޅުވާލާފައިވާ އެވޯޑްތަކުގެ ތެރޭގައި އިހްސާން ޑޮގްރަމަސީ ފެމިލީ ހެލްތު ފައުންޑޭޝަން ޕްރައިޒް، ސަސަކަވާ ހެލްތު ޕްރައިޒް، ޔުނައިޓެޑް އަރަބް އެމިރޭޓްސް ހެލްތު ފައުންޑޭޝަން ޕްރައިޒް، އަދި ކުވައިތު ހެލްތު ޕްރޮމޯޝަން ފައުންޑޭޝަންގެ "ހިޒް ހައިނެސް ޝައިޚް ޞަބާޙް އަލް-އަޙްމަދް އަލް-ޖާބިރް އަލް-ޞަބާޙް ޕްރައިޒް" ހިމެނެއެވެ. 

އިތުރު މަޢުލޫމާތު ހޯދުމަށް މިނިސްޓްރީގެ ޕޮލިސީ އިމްޕްލިމެންޓޭޝަން އެންޑް އިންޓަރނޭޝަނަލް ރިލޭޝަންސް ޑިވިޜަނާ ގުޅުމަށް ވެސް މިނިސްޓްރީން ވަނީ އެދިފައެވެ.