ރާއްޖެ ޓްރާންސްޕޯޓް ލިންކް (އާރްޓީއެލް)ގެ ޚިދުމަތަށް ބޭނުންކުރާނެ 12 ފެރީ ބަނުމަށްޓަކައި އިންޑިއާ ސަރުކާރުން ދޭން އެއްބަސްވެފައިވާ 100 މިލިއަން ރުފިޔާގެ ހިލޭ އެހީ ރާއްޖެއަށް ލިބިއްޖެއެވެ.

ޓްރާންސްޕޯޓް މިނިސްޓްރީގެ ޑެޕިއުޓީ މިނިސްޓަރު އިބްރާހީމް ޔާސިރު ވިދާޅުވި ގޮތުގައި މި އެހީގެ ދަށުން 12 ފެރީ ބަނުމުގެ އިތުރުން ރ. އުނގޫފާރުގައި އެއް ފެރީ ހަބް ގާއިމުކުރެވޭނެއެވެ. އަދި މިހާރު ވެސް އެ ހަބް ގާއިމުކުރުމަށް ބޭނުންވާ ސާމާނު އެ ރަށަށް ގެންދިޔުމުގެ މަސައްކަތް ވަނީ ފެށިފައެވެ.

Ad by Hajj Corporation

އާރްޓީއެލް ފެރީގެ ޚިދުމަތަށް 100 މިލިއަން ރުފިޔާގެ ހިލޭ އެހީ ދިނުމަށް އިންޑިއާ ސަރުކާރުން ނިންމައި، އެމްއޯޔޫގައި ސޮއިކޮށްފައިވަނީ މި އަހަރުގެ މެއި މަހުގެ 18 ވަނަ ދުވަހުއެވެ.

ދައުލަތުގެ މީޑިއާގެ 'ރާއްޖެ މިއަދު' ޕްރޮގްރާމުގައި ވާހަކަދައްކަވަމުން ޑެޕިއުޓީ މިނިސްޓަރު ވިދާޅުވީ އެ ފައިސާ މިހާރު ވަނީ ރާއްޖެއަށް ލިބިފައި ކަމަށެވެ.

"100 މިލިޔަން ރުފިޔާގެ ހިލޭ އެހީއެއް އިންޑިއާ ސަރުކާރުން ވަނީ ލިބިފަ. އެއީ 12 ފެރީ ބަނުމުގެ މަސައްކަތަށް. އަދި ޒޯން 2ގެ މައި ފެރީ ޓަރމިނަލް، އުނގޫފާރުގެ ފެރީ ހަބް އަޅާނީ މި އެހީގަ. މި މަސައްކަތްތައް ވަރަށް އަވަހަށް ފަށާނަން." ޑެޕިއުޓީ މިނިސްޓަރ ވިދާޅުވެފަވެއެވެ.

އާރްޓީއެލްގެ ޚިދުމަތަށް ބޭނުންވާ ފެރީތައް މިވަގުތު ވެސް ބަންނަމުންދާ ކަމަށް ޑެޕިއުޓީ މިނިސްޓަރު ފާހަގަކުރެއްވިއެވެ. އަދި މި މަޝްރޫޢުގެ ދަށުން ބަންނަ ފެރީތަކުގެ ތެރޭގައި 'ބެކަޕް' ގޮތުގައި ބޭނުންކުރާނެ ފެރީތައް ވެސް ހިމެނޭނެއެވެ.

އާރްޓީއެލް ޚިދުމަތަށް އަޅާ މައި ފެރީ ޓާމިނަލްތަކަކީ ކޮންމެ ޒޯނެއްގައި ހިމެނޭ އަތޮޅުތަކުގެ ޚިދުމަތް ބަލަހައްޓާ މައި ޓާމިނަލްތަކެވެ. މި މަޝްރޫޢުގެ ދަށުން ގާއިމުކުރެވޭ އައު ފެރީތަކާއި ހަބްތަކުން ރާއްޖޭގެ ދަތުރުފަތުރުގެ ނިޒާމަށް އިތުރު ފުރިހަމަކަމެއް ގެނެސްދޭނެއެވެ.

އެންމެ ފަހުން އާރްޓީލްގެ ޚިދުމަތް ފެށީ، މިދިޔަ ޖުލައި މަގު ފަހު ހަފްތާގައި ބ.އަތޮޅުގައެވެ.

މިހާރު ތައްޔާރުވަމުންދަނީ ޒޯން 4ގައި ހިމެނޭ މ، ފ، ދ، ތ އަދި ލ އަތޮޅުގައި ޚިދުމަތް ފެށުމަށެވެ.
ސަރުކާރުގެ ޢަމާޒު ހިފާފައި ވަނީ އަހަރު ނިމޭއިރު، ރާއްޖޭގެ ހުރިހާ ޚިސާބެއްގައި ޚިދުމަތް ފެށުމަށެވެ.