މި މަސް ނިމުމުގެ ކުރިން ލ. އަދި މ. އަތޮޅަށް އާރްޓީއެލް ފެރީގެ ހިދުމަތް ފެށުމުގެ މަސައްކަތް ކުރަމުން އަންނަކަމަށް ދަތުރުފަތުރާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީން ވިދާޅުވެއްޖެއެވެ.

ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ވަޒީރު ވަނީ މިޚިދުމަތް މިދިޔަ މަހުގެ ފ. އަދި ދ. އަތޮޅުގައި މިދިޔަ މަހު ފަށާފައިވާ ކަމަށް ވިދާޅުވެފައެވެ. އަދި މިމަހުގެ ނިޔަލަށް އިތުރު ދެ އަތޮޅަކަށް ޚިދުމަތް ފުޅާކުރުމަށް މަސައްކަތް ކުރަމުންދާ ކަމަށް ވަޒީރު ވިދާޅުވިއެވެ.

Ad by Hajj Corporation

ރައްޔިތުންނަށް ރަނގަޅު ފެންވަރެއްގައި ދެމެހެއްޓެނިވިގޮތަކަށް ދަތުރުފަތުރު ޚިދުމަތް ދިނުމަށް ދަތުރުފަތުރާ ބެހޭ ވުޒާރާގެ ބެލުމުގެ ދަށުން ފަށާފައިވާ އާރްޓީއެލް ޚިދުމަތް މިހާތަނަށް ރާއްޖޭގެ ގިނަ އަތޮޅުތަކެއްގައިވަނީ ފަށާފައެވެ. އެމްޓީސީސީ މެދުވެރިކޮށް ދެމުންދާ މި ޚިދުމަތް މިހާތަނަށް 14 އަތޮޅެއްގައި ފަށާފައިވާއިރު، މި ޚިދުމަތް ރާއްޖޭގެ ހުރިހައި އަތޮޅެއްގައި މިއަހަރުގެ މެދާއި ހަމައަށް ދާއިރު ޤާޢިމުކޮށް ނިންމުމަކީ ސަރުކާރުގެ އަމާޒެކެވެ.

މިއަހަރުގެ ރިޔާސީ ބަޔާން އިއްވަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުވަނީ މި ޚިދުމަތް ޖޫން މަހުގެ ނިޔަލަށް މިހާރު ޚިދުމަތް ޤާއިމް ނުކުރެވި އަތޮޅުގައި ތަކުގައި ޤާއިމްކޮށް ނިންމަވާނެ ކަމަށް ވިދާޅުވެފައެވެ.

އާރްޓީއެލް ޚިދުމަތް ކޮންމެ އަތޮޅެއްގައިވެސް ފަށަނީ، އެއް ހަފުތާއަށް އެ ޚިދުމަތައް އެ އަތޮޅެއްގެ ރައްޔިތުން އަހުލުވެރި ކުރުމަށް ހިލޭ ދަތުރުކުރެވޭގޮތަށް ޚިދުމަތް ދިނުމަށް ފަހުއެވެ. އޭގެ ފަހުން އަތޮޅުގެ އެކި ރޫޓުތަކާޢި އެހެން އަތޮޅުތައް ގުޅުވާލެވޭ ރޫޓުތަކުގައި އަގު ނަގަން ފަށައެވެ. މި ޚިދުމަތް ދެމުންދަނީ ސަރުކާރުން ސަބްސިޑައިޒްކުރާ ގޮތަށް ހެޔޮ އަގެއްގައެވެ.

އާރްޓިއެލްގެ ޚިދުމަތް ފެށީ، 2022ވަނަ އަހަރުގައެވެ. ދަތުރުފަތުރުގެ ދާއިރާއިން ޚާއްޞަ އިސްކަމެއް ދޭ މަސައްކަތްތަކުގެ ތެރެއިން، ކަނޑައަޅާފައިވާ ތާވަލާ އެއްގޮތަށް މި ސަރުކާރުންވެސް އަންނަނީ މި މަސައްކަތް ކުރިއަށް ގެންދަމުންނެވެ. އެގޮތުން މިހާތަނަށް 14 އަތޮޅެއްގެ 133 ރަށަކަށް މި ޚިދުމަތް ވަނީ ފަށާފައެވެ.

ރާއްޖޭގެ ރަށްތަކުގައި އާރްޓީއެލް ހައިސްޕީޑް ފެރީގެ ޚިދުމަތް ދެމުންދަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، އެމްޓީސީސީއާ ހަވާލުކޮށްގެންނެވެ.