ސިއްހީއެކިއެކި ހިދުމަތްތަކަށް ދާއިމީކޮށް އާރްޓީއެލް ފެރީގައި ދަތުރުކުރާ މީހުންނަށް ހިލޭ ދަތުރުކުރެވޭނެ އިންތިޒާމު ވަރަށް އަވަހަށް ހަމަޖައްސާނެކަމަށް ދަތުރުފަތުރާ މަދަނީ އުދުހުންތަކާ ބެހޭ ވުޒާރާއިން ބުނެފިއެވެ.

ދަތުރުފަތުރާ މަދަނީ އުދުހުންތަކާ ބެހޭ ވުޒާރާގެ ޑެޕިއުޓީ މިނިސްޓަރ އިބްރާހިމް ޔާސިރް ވިދާޅުވީ އާއްމުންގެ ހިޔާލުތަކާ އެއްގޮތަށް، ރައްޔިތުން ބޭނުންވާ ބަދަލުތަކާ އެއްގޮތަށް ހިދުމަތަށް ބަދަލުތަކެއް ގެންނަމުންދާ ކަމަށާއި، އެގޮތުން ބޮޑެތި އަދި ދާއިމީ ބަލިތަކާ ގުޅިގެން، ގަވައިދުން ފަރުވާއަށް ދަތުރުކުރަންޖެހޭ މީހުންނަށް އާރްޓީއެލްގައި ހިލޭ ދަތުރުކުރެވޭނެ އިންތިޒާމް ހަމަޖައްސަމުންދާކަމަށެވެ. އަދި އެ މަސައްކަތް ކުރިއަށްގެންދަނީ ދަތުރުފަތުރާ ބެހޭ ވުޒާރާއާއި ނެޝަނަލް ސޯޝަލް ޕްރޮޓެކްޝަން އެޖެންސީ އެންސްޕާ އަދި އެމްޓީސީސީ ގުޅިގެން ކަމަށް ވެސް ޔާސިރު ވިދާޅުވިއެވެ.

ޔާސިރު ވިދާޅުވީ، އެކަން ފެށުމަށް ވަރަށް ފުޅާ ދާއިރާއެއްގައި މަޝްވަރާކުރަމުން ދާ ކަމަށާއި، އަދި އެ ހިދުމަތް ފެށުމާ ވަރަށް ގާތަށް އާދެވިފައިވާ ކަމަށެވެ. އެގޮތުން އެ ހިދުމަތަށް ބީއެމްއެލްގެ ހާއްސަ ކާޑެއް އެންސްޕާ މެދުވެރިކޮށް ދޭނެ ކަމަށާއި، އެ ކާޑު ބޭނުންކޮށްގެން ބަލިމީހާއާއި އަދި އެހީތެރިޔާއަށް ހިލޭ ދަތުރުކުރެވޭނެ ކަމަށް ވެސް ޔާސިްރު ވިދާޅުވިއެވެ.

Ad by Hajj Corporation

ހާއްސަ އެހީތެރިކަމަށް ބޭނުންވާ މީހުންނާ އުމުރުން ދުވަސްވީ މީހުންނަށް މިހާރުވެސް އާރްޓީއެލްގެ ހިދުމަތުގެ ތެރެއިން ހިލޭ ދަތުރުކުރެވެއެވެ.

ރާއްޖެ ޓްރާންސްޕޯޓް ލިންކް، އާރުޓީއެލްގެ ހައި ސްޕީޑް ފެރީގެ ހިދުމަތަކީ، ބަރޯސާވެވޭ ނިޒާމެއްގެތެރެއިން އަގުހެޔޮކޮށް ދަތުރުކުރެވޭނެ ގޮތް ރައްޔިތުންނަށް ފަހިކޮށްދިނުމަށް ސަރުކާރުން ފަށާފަވާ ހިދުމަތެކެވެ. މި ހިދުމަތް މިހާތަނަށް 11 އަތޮޅެއްގައި ފަށާފަވާއިރު، ޚިދުމަތުގެ ފެންވަރު ރަނގަޅުކޮށް އާއްމުންނަށް ލުއިފަސޭހަވާނެ ގޮތައް ބަދަލުތައް ދަނީ ގެންދަމުންނެވެ.

އެގޮތުން ރާއްޖެ ޓްރާންސްޕޯޓް ލިންކްގެ ރޫޓުތައްވެސް ކަނޑައަޅާފަވަނީ، އާއްމު ހިދުމަތްތައް ހޯދުމަށް ދަތުރުކުރާ ރަށްތަކާ ކޮންމެ ރޫޓަކުންވެސް ފަސޭހައިން ގުޅޭގޮތަށެވެ. އެގޮތުން ސިއްޙީ ޚިދުމަތްތަކާ ސަރުކާރުގެ މުވައްސަސާތަކުން އަސާސީ ޚިދުމަތްތައް ހޯދުމަށް ފަހިވާގޮތަށެވެ.