ރާއްޖެ ޓްރާންސްޕޯޓް ލިންކް" (އާރްޓީއެލް) ފެރީގެ ޚިދުމަތް އަންނަ ފެބްރުއަރީ މަހުގެ ތެރޭގައި އިތުރު އަތޮޅެއްގައި ފެށުމަށް ތައްޔާރުވަމުން އަންނަކަމަށް ޓްރާސްޕޯޓު މިނިސްޓްރީން ބުނެފިއެވެ.

ޓްރާސްޕޯޓު މިނިސްޓްރީން ބުނީ އަންނަ މަހު ޚިދުމަތް ފަށާނެ އަތޮޅުތަކާއި އޭގެ އުސޫލުތައް ކަނޑައެޅުމުގެ ފަހުގެ މަސައްކަތްތައް މިހާރު ކުރިއަށްދާ ކަމަށެވެ.

Ad by Hajj Corporation

މުޅި ރާއްޖެ ހަ ޒޯނަކަށް ބަހާލައިގެން ދެމުން އަންނަ މި ޚިދުމަތް މިހާތަނަށް 4 ޒޯނެއްގެ 12 އަތޮޅެއްގައި ވަނީ ފަށާފައެވެ. އެންމެ ފަހުން މި ޚިދުމަތް ފަށާފައިވަނީ ތ. އަތޮޅުގައެވެ.މިހާތަނަށް އާރްޓީއެލްގެ ޚިދުމަތް ނުފަށާ އޮތީ ޒޯން 3 އަދި ޒޯން 4 ގައެވެ. މީގެ ތެރެއިން ޒޯން 3 ގައި ހިމެނެނީ ކ، އއ، އދ އަދި ވ. އަތޮޅެވެ.

ޒޯން 4 ގައި ހިމެނެނީ މ، ފ، ދ އަދި ލ. އަތޮޅެވެ.އެމްޓީސީސީއާ ހަވާލުކޮށްގެން ކުރިއަށްގެންދާ މި މަޝްރޫއާ ގުޅޭގޮތުން އެ ކުންފުނިން ބުނީ، ބާކީ ހުރި އަތޮޅުތަކަށް ޚިދުމަތް ދިނުމަށް ބޭނުންވާ ފެރީތައް ބަނުމުގެ މަސައްކަތް ބާރުދުވެލީގައި ކުރިއަށްދާ ކަމަށެވެ. އަދި ތާވަލާ އެއްގޮތަށް މަސައްކަތް ނިމެމުންދާ ވަރަކުން އަތޮޅުތަކަށް ދަތުރުތައް ފަށަމުންދާނެ ކަމުގެ ޔަގީންކަން އެމްޓީސީސީން ވަނީ ދީފައެވެ.

ރައީސް ޑރ. މުޙައްމަދު މުޢިއްޒު މިދިޔަ އޮކްޓޯބަރު މަހު އަތޮޅުތަކަށް ކުރެއްވި ދަތުރުފުޅުގައި ވަނީ، އަންނަ މާރިޗު މަހުގެ ނިޔަލަށް ރާއްޖޭގެ ހުރިހާ އަތޮޅެއްގައި އާރްޓީއެލްގެ ޚިދުމަތް ގާއިމުކޮށް ނިންމުމަކީ ސަރުކާރުގެ އަމާޒެއް ކަމަށް ވިދާޅުވެފައެވެ.