މޯބައިލް އެޕްލިކޭޝަންތައް ބޭނުންކޮށްގެން ޓެކްސީގެ ޚިދުމަތްދޭ ޑްރައިވަރުން، މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނުން ދޫކުރާ ޚާއްސަ ހުއްދައެއް ހޯދުން މަޖުބޫރުވާ ގޮތަށް ޓެކްސީ ގަވާއިދު އިސްލާހުކޮށްފިއެވެ.

މިއަދު ޓްރާންސްޕޯޓް މިނިސްޓްރީން ނެރުނު ނޫސްބަޔާނެއްގައި ބުނެފައިވަނީ، މި ބަދަލަކީ ދަތުރުވެރިންގެ ރައްކާތެރިކަން ކަށަވަރުކުރުމަށާއި، ޑިޖިޓަލްކޮށް ޚިދުމަތްދޭ ޑްރައިވަރުން ޖަވާބުދާރީ ކުރުވުމަށް ލިބޭ ބާރެއް ކަމަށެވެ. އަދި މީގެ ފަހުން މޯބައިލް އެޕްލިކޭޝަނެއް ނުވަތަ އޮންލައިން ޕޯޓަލްތައް މެދުވެރިކޮށް ޓެކްސީ ޚިދުމަތް ދޭން ބޭނުންވާ ހުރިހާ ޑްރައިވަރުން މިނިސްޓްރީގެ ޚާއްސަ ހުއްދަ ހޯދަން ޖެހޭނެއެވެ.

Ad by Hajj Corporation

ގަވާއިދަށް ގެނައި އިތުރު މުހިންމު ބަދަލުތައް:

• ސީ ސެންޓަރެއް ރަޖިސްޓްރީ ކުރުމަށް ބޭނުންވާ އުޅަނދާއި ޑްރައިވަރުންގެ އެންމެ މަދު އަދަދު 100 އިން 50 އަށް މަދުކުރުން
• ލައިސަންސް އޮންނަ ޓެކްސީ ޑްރައިވަރުންނަށް އެއް ވަގުތެއްގައި ދެ ޓެކްސީ ސެންޓަރެއްގައި ރަޖިސްޓަރީވެގެން މަސައްކަތް ކުރުމުގެ ފުރުސަތު
•  ކުންފުންޏަކުން ދަތުރުފަތުރުގެ ޚިދުމަތް ދޭނަމަ، އެއީ އެ ކުންފުންޏެއްގެ މެންޑޭޓުގައި ހިމެނޭ ކަމެއްކަން ކަށަވަރުކުރަން ޖެހުން
• ގަވާއިދާ އެއްގޮތަށް ރަޖިސްޓަރީކޮށް ހުއްދަ ހޯދުން ޓެކްސީ ޚިދުމަތްދޭ ކުންފުނިތަކަށް ލާޒިމްވުން

މިނިސްޓްރީން ބުނި ގޮތުގައި މި ހުރިހާ ބަދަލުތަކެއްގެ މައިގަނޑު އަމާޒަކީ ފަސިންޖަރުންނާއި ޚިދުމަތް ދޭ ފަރާތްތަކަށް ވެސް މަންފާ ކުރާނެ، އިތުރުބާރު ހުރި އަދި ޒަމާނީ ޓެކްސީގެ ނިޒާމެއް ރާއްޖޭގައި ޤާއިމްކުރުމެވެ.