ޖުލައިމަހު ރާއްޖެ އައި ފަތުރުވެރިންގެ އަދަދު %11.5 މައްޗަށް

4 އޯގަސްޓު 2025 - 02:20

މިއަހަރުގެ ޖުލައި މަހު ރާއްޖެއަށް ޒިޔާރަތްކުރި ފަތުރުވެރިންގެ އަދަދު މިދިޔަ އަހަރާ އަޅާބަލާއިރު 11.5 އިންސައްތަ އިތުރުވެއްޖެއެވެ.
ފަތުރުވެރިކަމާ ބެހޭ ވުޒާރާއިން އާންމުކޮށްފައިވާ ތަފާސްހިސާބުތަކުން ދައްކާގޮތުން މިއަހަރުގެ ޖުލައި މަހު ރާއްޖެއަށް 186،738 ފަތުރުވެރިން ޒިޔާރަތްކޮށްފައިވެއެވެ. މިއީ މިދިޔަ އަހަރުގެ ޖުލައި މަހު ރާއްޖެއަށް ޒިޔާރަތްކުރި 167،528 ފަތުރުވެރިންނާ އަޅާބަލާއިރު ފާހަގަކުރެވޭ އިތުރުވުމެކެވެ.

Ad by Hajj Corporation
މިއަހަރުގެ މިހާތަނަށް ރާއްޖެއަށް ޖުމްލަ 1،308،582 ފަތުރުވެރިން ޒިޔާރަތްކޮށްފައިވާއިރު، މިއީ 2024 ވަނަ އަހަރާ އަޅާބަލާއިރު 9.5 އިންސައްތައިގެ ކުރިއެރުމެކެވެ. މި ފަތުރުވެރިންގެ ތެރެއިން 73.1 އިންސައްތަ ކަމުގައިވާ 932،504 ފަތުރުވެރިން ޗުއްޓީ ހޭދަކޮށްފައިވަނީ ރިސޯޓުތަކުގައެވެ.
ފަތުރުވެރިކަމުގެ ދާއިރާއިން ދައުލަތަށް ލިބޭ އާމްދަނީއަށް ބަލާއިރު، މިދިޔަ މަހުގެ 17 ވަނަ ދުވަހުގެ ނިޔަލަށް ގްރީން ޓެކްސްގެ ގޮތުގައި 1.1 ބިލިއަން ރުފިޔާ ލިބިފައިވެއެވެ. މިއީ މިދިޔަ އަހަރުގެ މި މުއްދަތުގައި ލިބުނު 587 މިލިއަން ރުފިޔާއަށްވުރެ 563.4 މިލިއަން ރުފިޔާގެ އިތުރުވުމެކެވެ.
ފަތުރުވެރިން ބޭނުންކުރާ ތަންތަނަށް ބަލާއިރު، ގެސްޓްހައުސްތަކުގައި 22.1 އިންސައްތަ ކަމުގައިވާ 281،669 ފަތުރުވެރިން ޗުއްޓީ ހޭދަކޮށްފައިވެއެވެ. މީގެއިތުރުން ހޮޓާތަކުގައި 34،306 ފަތުރުވެރިންނާއި، ސަފާރީ އުޅަނދުތަކުގައި 26،869 ފަތުރުވެރިން ޗުއްޓީ ހޭދަކޮށްފައިވެއެވެ. އަދި އެހެނިހެން ތަންތަނުގައި 894 ފަތުރުވެރިން ޗުއްޓީ ހޭދަކޮށްފައިވެއެވެ.
މިވަގުތު ރާއްޖޭގައި ފަތުރުވެރިކަމުގެ ޚިދުމަތް ފޯރުކޮށްދެމުންދަނީ 175 ރިސޯޓާއި، 886 ގެސްޓްހައުސްގެ އިތުރުން 159 ސަފާރީ އުޅަނދާއި 16 ހޮޓަލުންނެވެ.