ޅ. ނައިފަރަށް ނިސްބަތްވާ 15 އަހަރުގެ އަންހެންކުއްޖަކު ގެއްލިގެން ހޯދުމުގެ މަސައްކަތް ކުރަމުން އަންނަކަމަށް ފުލުހުން އަންގާރަ ދުވަހު ބުނެފިއެވެ.

ފުލުހުންގެ ޚިދުމަތުން މައުލޫމާތު ދިންގޮތުގައި ގެއްލިގެން ހޯދަމުންދަނީ ޅ. ނައިފަރު / ސީނިޔާގެ، ޚަދީޖަތު މައިސަރާ އަބޫބަކުރު ފައިސަލް (15 އަހަރު) އެވެ.

Ad by Hajj Corporation

އޭނާގެ އާއިލާއަށް އެއްވެސް ޚަބަރެއް ނުވެ ގެއްލިފައިވާ ކަމަށް ރިޕޯޓުކުރުމާ ގުޅިގެން، އެ ކުއްޖާ ހޯދުމުގެ މަސައްކަތް ފުލުހުން ދަނީ ކުރަމުންނެވެ.

ފުލުހުން ދިން މައުލޫމާތުގައި، މައިސަރާ ގެއްލުނުއިރު ހުރީ އަތްކުރު ވިލުނޫކުލައިގެ ޓީޝާޓަކާއި ފެހިކުލައިގެ ސައިޑްޕޮކެޓް ޓްރެކް ބޮޓަމެއް ލައިގެން ކަމަށް ބުނެފައިވެއެވެ.

މި މައްސަލައިގައި އާންމު ރައްޔިތުންގެ އެހީތެރިކަން ހޯދުމަށް ފުލުހުން ވަނީ އެދިފައެވެ. އެގޮތުން މައިސަރާއާ ބެހޭ އެއްވެސް މައުލޫމާތެއް ލިބިފައިވާނަމަ ނުވަތަ ފެނިއްޖެނަމަ، ނައިފަރު ޕޮލިސް ސްޓޭޝަންގެ ނަންބަރު 9792187 އަށް ނުވަތަ ފުލުހުންގެ ހޮޓްލައިން ނަންބަރު 3322111 އަށް ގުޅައި މައުލޫމާތު ހިއްސާކުރުމަށް ފުލުހުން ވަނީ އެދިފައެވެ.