މިދިޔަ އަހަރުގެ ޖޫން އިން މި އަހަރުގެ ޖޫންގެ ނިޔަލަށް ފާއިތުވި 12 މަހުގެ ތެރޭގައި، ތަކެއްޗާއި ޚިދުމަތްތަކުގެ މުޅި ޖުމްލަ އަގުތައް 3.76 އިންސައްތަ މަތިވެފައިވާ ކަމަށް ކޮންޒިއުމާ ޕްރައިސް އިންޑެކްސް (ސީޕީއައި)އިން ދައްކައިފިއެވެ.

ޤައުމީ ތަފާސް ހިސާބުތަކާ ބެހޭ އިދާރާ އިން ނެރުނު ސީޕީއައި ރިޕޯޓުން ދައްކާ ގޮތުން، ފާއިތުވި އަހަރުގެ ތެރޭގައި ބޮޑުވި އަގުތަކުގެ ތެރެއިން، އެންމެ ބޮޑަށް ބޮޑުވެފައިވަނީ ދުންފަތާއި ދުފަން ގެންގުޅޭ އަދި އެއާ ގުޅުންހުރި ތަކެތީގެ އަގެވެ. އެގޮތުން އެ ތަކެތީގެ އަގު 88.94 އިންސައްތަ އިތުރުވެފައިވާއިރު، ދެވަނައަށް އެންމެ ބޮޑުވެފައިވަނީ ރެސްޓޯރަންޓްތަކާއި ހޮޓާ ޚިދުމަތްތަކުގެ އަގުތަކެވެ.

Ad by Hajj Corporation

އެގޮތުން ފާއިތުވި އަހަރުގެ ތެރޭގައި ރެސްޓޯރަންޓްތަކާއި ހުރުމުގެ އަގުތައް 29.26 އިންސައްތަ ބޮޑުވެފައިވާއިރު، ކާބޯތަކެތީގެ އަގުތައް 4.64 އިންސައްތަ ވަނީ ބޮޑުވެފައެވެ. އެގޮތުން މަހުގެ ބާވަތްތަކުން އެކަނި ވެސް އަގުތައް 6.45 އިންސައްތަ އިތުރުވެފައިވާ ކަމަށް އެ ތަފާސް ހިސާބުތަކުން ދައްކައެވެ.

އެގޮތުން މޭވާގެ ބާވަވްތަކުގެ އަގުތައް 3.20 އިންސައްތަ އިތުރުވެފައިވާއިރު، ކިރުގެ ބާވަތްތަކުން 1.22 އިންސައްތަ އަދި ތަރުކާރީގެ ބާވަތްތަކުން 0.83 އިންސައްތަ އަދި ބިހުން 1.22 އިންސައްތަ އަގުތައް އިތުރުވެފައިވާ ކަމަށް އެ ހިސާބުތަކުން ދައްކައެވެ.

އެ ހިސާބުތަކުން ދައްކާ ގޮތުން، ފާއިތުވި އަހަރުގެ ތެރޭގައި އަގުތައް ކުޑަވި ޚިދުމަތްތަކުގެ ތެރެއިން، އެންމެ ފާހަގަކުރެވޭ ބަދަލެއް އައިސްފައިވަނީ ކަރަންޓުންނެވެ. އެގޮތުން ކަރަންޓުގެ އަގުތައް 3.1 އިންސައްތަ އެ މުއްދަތުގެ ތެރޭގައި ކުޑަވެފައިވާ ކަމަށް އެ ތަފާސް ހިސާބުތަކުން ދައްކާއިރު، މުވާސަލަތީ ދާއިރާތަކުގެ އަގުތައް 5.34 އިންސައްތަ ކުޑަވެފައިވާ ކަަމަށް ވެސް އެ ހިސާބުން ދައްކައެވެ.

އެ ހިސާބުން ދައްކާ ގޮތުން، މާލޭގެ ތަކެއްޗާއި ޚިދުމަތްތަކުގެ އަގު 3.45 އިންސައްތަ މަތިވިއިރު، އަތޮޅުތެރޭގެ އެހެން ރަށްތަކުގެ ޚިދުމަތްތަކާއި ތަކެތީގެ އަގުވަނީ އެއަށްވުރެ ވެސް މަތިވެފައެވެ. އެގޮތުން މާލޭ އޭރިއާ ނޫން ރަށްތަކުގެ ޚިދުމަތްތަކާއި ތަކެތީގެ އަގުތައް މުޅި ޖުމްލަ 4.22 އިންސައްތަ މަތިވެފައިވާ ކަމަށް އެ ތަފާސް ހިސާބުން ދައްކައެވެ.