ރާއްޖޭގެ ޒުވާނުންގެ 46 އިންސައްތަ ދިރިއުޅެނީ ވެރިރަށް މާލެ ސަރަޙައްދުގައި ކަމަށް ޤައުމީ ތަފާސް ހިސާބުތަކާ ބެހޭ ބިއުރޯގެ ތަފާސް ހިސާބުތަކުން ދައްކައިފިއެވެ.

ޒުވާނުންގެ ދުވަހާ ގުޅުވައި އެ އިދާރާއިން ނެރުނު ތަފާސް ހިސާބުތަކުން ދައްކާ ގޮތުން، ރާއްޖޭގެ ޒުވާނުންގެ އަބާދީއަކީ 117،076 އެވެ. އޭގެ ތެރޭގައި ހިމެނެނީ 60،025 ފިރިހެނުންނާއި 57،051 އަންހެނުންނެވެ. ބިދޭސީންނާއެކު ރާއްޖޭގައި 198،295 ޒުވާނުން ދިރިއުޅޭ ކަމަށް ވެސް އެ ތަފާސް ހިސާބުތަކުން ދައްކައެވެ.

Ad by Hajj Corporation

އެ ތަފާސް ހިސާބުތަކުން ދައްކާ ގޮތުން، ރާއްޖޭގެ އަތޮޅުތަކުގެ ތެރެއިން އެންމެ ގިނަ ޒުވާނުން ދިރިއުޅެނީ މާލެ ނުހިމަނައި، ކާފު އަތޮޅުގައެވެ. އެގޮތުން އެ އަތޮޅުގައި 8،679 ޒުވާނުން ދިރިއުޅޭއިރު، ދެވަނައަށް އެންމެ ގިނަ ޒުވާނުން ދިރިއުޅެނީ ހއ. އަތޮޅުގައެވެ. އެ އަތޮޅުގައި 5،180 ޒުވާނުން ދިރިއުޅެއެވެ. ތިން ވަނައަށް އެންމެ ގިނަ ޒުވާނުން ދިރިއުޅޭ އައްޑޫގައި 5،007 ޒުވާނުން ދިރިއުޅެއެވެ.

އެ ހިސާބުތަކުން ދައްކާ ގޮތުން މާލޭގައި އެކަނި ވެސް 54،141 ޒުވާނުން ދިރިއުޅޭއިރު، އަތޮޅުތެރޭގެ އެހެނިހެން ރަށްތަކުގައި ދިރިއުޅެނީ 62.935 ޒުވާނުންނެވެ.

އެ ހިސާބުތަކުން ދައްކާ ގޮތުން ރާއްޖޭގެ ޒުވާނުންގެ އާބާދީގެ 60 އިންސައްތަ ޒުވާނުންނަކީ ވަޒީފާ އަދާކުރާ ފަރާތްތަކެވެ. ފަސް އިންސައްތަ ޒުވާނުން ވަޒީފާއެއްގައި ނުޅޭއިރު، 25 އިންސައްތަ ޒުވާނުންނަކީ ވަޒީފާގެ މާޙައުލުން ބޭރުގައި މަތީ ތަޢުލީމު ހާސިލުކުރުން ފަދަ ދާއިރާތަކުގައި ތިބި ޒުވާނުންނެވެ.

އެ ހިސާބުތަކުން ދައްކާ ގޮތުން ރާއްޖޭގެ ޒުވާނުންގެ ތެރެއިން އެންމެ ގިނަ ޒުވާނުން މަސައްކަތްކުރަނީ ކާބޯތަކެއްޗާއި އެކަމޮޑޭޝަންގެ ދާއިރާގައި ހަރަކާތްތެރިވާ ޒުވާނުންނެވެ. އެއީ 19 އިންސައްތަ ޒުވާނުންނެވެ. 16 އިންސައްތަ ޒުވާނުން އިދާރީ މަސައްކަތްތަކާއި ޑިފެންސްގެ ދާއިރާގައި މަސައްކަތްކުރާއިރު، ހޯލް ސޭލް އަދި ރީޓެއިލްގެ ދާއިރާގައި 11 އިންސައްތަ ޒުވާނުން މަސައްކަތްކުރެއެވެ. 10 އިންސައްތަ ޒުވާނުން ތަޢުލީމީ ދާއިރާގައި މަސައްކަތްކުރާއިރު، ހަމަ އެ އިންސައްތައިގެ ޒުވާނުން ދަތުރުފަތުރުގެ ނިޒާމުގައި މަސައްކަތްކުރެއެވެ.

އިޖްތިމާއި މަސައްކަތްތަކާއި ސިއްޚީ ދާއިރާގައި މަސައްކަތްކުރާ ކަމަށް ދައްކަނީ ހަތް އިންސައްތަ ޒުވާނުންނެވެ.

މީގެ އިތުރުން، ރާއްޖޭގެ ޒުވާނުންގެ ތެރެއިން ޕްރައިމަރިއާ ހަމައަށް އެންމެ މަތީ ތައުލީމު އުނގެނިގެން ތިބީ ތިން އިންސައްތަ ޒުވާނުންނެވެ. 51 އިންސައްތަ ޒުވާނުންނަކީ އެ މީހުންގެ އެންމެ މަތީ ތައުލީމުގެ ގޮތުގައި ސާނަވީ އާ ހަމައަށް ކިޔެވި ޒުވާނުންނަށް ވާއިރު، އެމީހުންގެ އެންމެ މަތީ ތައުލީމުގެ ގޮތުގައި މަތީ ސާނަވީ އާ ހަމައަށް ކިޔަވާފައިވަނބީ 13 އިންސައްތަ ޒުވާނުންނެވެ.

އެއަށް ވުރެ މަތީގެ ފާސްތައް ހޯދާފައިވަނީ މުޅި ޖުމްލަ 33 އިންސައްތަ ޒުވާނުންނެވެ.