ރަމައްޟާގައި ހުންނަ އަލްޖަޒީރާ އޮފީސް ނިރުބަވެރި އިޒުރޭލުން ވަދެ ބަންދުކޮށްފިއެވެ .

އިޒުރޭލުގެ ސިފައިން ހަތިޔާރާއި އެކު ރަމައްޟާގައި ހުންނަ އަލްޖަޒީރާގެ ބިއުރޯއަށް ވަދެފައިވަނީ އިއްޔެގެ ވަގުތެއްގައިއެވެ. އަލްޖަަޒީރާއަށް ވަނުމުގެ އަމުރު ނެރެފައިވަނީ އިޒުރޭލުގެ އަސްކަރިއްޔާގެ އިސް ޖެނެރަލް އެއް ކަމަށް އަލްޖަޒީރާއިން ވަނީ ހާމަކޮށްފައެވެ. އިޒުރޭލުން ވަނީ 45 ދުވަހަސް އަލްޖަޒީރާގެ ޙިދުމަތްތައް ދިނުން މަޑުޖައްސާލަން އަންގާފައެވެ. އަދި އަލްޖަަޒީރާ އޮފީސް ހިންގާ އިމާރާތް ބަންދުކޮށް 10 މިނަޓް ތެރޭގައި އެތަން ހުސްކުރުމަށް އެތަނުގެ މުވައްޒަފުންނަށް ވަނީ އަންގާފައި ކަމަށް އަލްޖަޒީރާގެ އިސްވެރިން ވަނީ ވިދާޅުވެފައެވެ.

ފޮޓޯ--/ އިޒުރޭލު ސިފައިން އަލްޖަޒީރާ އޮފީހަށް ވަދެ ހަރަކާތްތެރިވަނީ

އަލްޖަޒީރާގެ ބިއުރޯއަށް އިޒުރޭލުގެ ސިފައިން ވަދެގަތީ އެތަނުގެ މަސައްކަތްތަކާއި ޕްރޮގްރާމް ތައް ވަގުން ބްރޯޑްކާސްޓް ކުރަމުން ދިޔަ ވަގުތެއްގައެވެ. ނިރުބަވެރިން ވަނީ އަލްޖަޒީރާގެ އިމާރާތަށް ވަދެ އެތަނުގައި މަސައްކަތްކުރާ ސްޓާފުން އެތަނުން ގަދަކަމުން ނެރެލާފައެވެ. އިޒުރޭލުން މިއަމަލު ހިންގީ އެތަނުގެ ކެމެރާތަކުގެ މަތީގައި އަތްއަޅައި ކެމެރާތައް ބްލޮކް ކުރުމަށްފަހުގައެވެ.

އިޒުރޭލުން ވަނީ އަލްޖަޒީރާގެ މުވައްޒަފުން ބޭރަށް ނެރެ އަލްޖަޒީރާގެ ބިއުރޯގެ ޗީފް އަތުން ވާހަކަދައްކަވަން ހުއްޓާ މައިކު އަތުލާފައެވެ. އަލްޖަޒީރާގެ މުވައްޒަފުންނަށް އަމިއްލަ ކާރު ތަކަށް ވެސް އެރުން ވެސް އިޒުރޭލުން މަނާކޮށްފައިވީއިރު އަލްޖަޒީރާގައި ބޭނުންކުރާ ހުރިހާ ސާމާނެއް ވަނީ ޔަހޫދީ ސިފައިންގެ ބެލުމުގެ ދަށަށް ގެންގޮސްފައި ކަމަށް އަލްޖަޒީރާއިން ވަނީ ބުނެފައެވެ. މީގެ އިތުރުން އިޒުރޭލު ސިިފައިންވަނީ އަލްޖަޒީރާގެ އޮފީހުގައި ހުރި ބައެއް ނޫސްވެރިންގެ ފޮޓޯތައް ވެސް ވިދާލާފައި ކަމަށާއި އޭގެ ތެރޭގައި އިޒުރޭލުން ޝަހީދުކޮށްލި ނޫސްވެރިންގެ ފޮޓޯތައް ހިމެނޭ ކަމަށްވެސް އަލްޖަޒީރާއިން ވަނީ ބުނެފައެވެ.

އަލްޖަޒީރާގެ އިސް އޮފިޝަލުން ހާމަކުރެއްވި ގޮތުގައި މިއީ ނިރުބަވެރިން ހިންގާ ގަތުލުޢާއްމުތައް ސިއްރުކުރަން ކުރާ މަސައްކަތް ކަމަށާއި މިކަމުގެ ސަބަބުން ފަހަތަށް ނުޖެހޭނެކަމަށެވެ. އިޒުރޭލުން ވަނީ އަލްޖަޒީރާއިން ޓެރަރިޒަމް އަށް ހިތްވަރުދީ ތާއީދުކުރާކަމަށް ތުހުމަތުކޮށްފައެވެ. ނަމަވެސް އަލްޖަޒީރާއިން ވަނީ މި ތުހުމަތުތައް ދޮގުކޮށްފައެވެ. އަދި މިކަމަކީ އިޒުރޭލުން މިނިވަން ނޫސްވެރިކަމާއި ދެކޮޅަށް ހިންގާ އުސޫލެއްނެތް ޖަރީމާތަކެއް ކަމުގައި ސިފަކޮށްފައެވެ. ދުނިޔޭގެ މަސްރަހު ދިރާސާކުރާ ގިނަ ފަރާތްތަކުން ވަނީ ނިރުބަވެރިންގެ މިއަމަލުކުށްވެރިކޮށްފައެވެ.