ޗެލްސީގެ ސެނެގަލް ސްޓްރައިކަރު ނިކޮލަސް ޖެކްސަން އަށް ނިއުކާސްލް ޔުނައިޓެޑުން ރަސްމީ އޮފަރެއް ހުށަހެޅުމުގެ މަސައްކަތް ފަށައިފިއެވެ.

24 އަހަރުގެ ސްޓްރައިކަރު ވިއްކާލުމަށް ޗެލްސީން އެއްބަސްވެފައިވާ ކަމަށާއި، ދެ ކުލަބުގެ މެދުގައި އިބްތިދާއީ މަޝްވަރާތައް ކުރިއަށް ގޮސްފައިވާ ކަމަށް ވެސް ބެން ޖޭކޮބްސް ހާމަކުރިއެވެ. ޖެކްސަން ދޫކޮށްލުމަށް ޗެލްސީން އަގުކޮށްފައިވަނީ 80 މިލިއަން ޕައުންޑުގައެވެ.

ލީގު ފެށެން ކުޑަދުވަސްކޮޅަކަށް ވެފައިވަނިކޮށް ނިއުކާސަލް އިން އެންމެ ފަހުން ސޮއި ހޯދަން މަސައްކަތްކުރި ސެސްކޯވެސް މިހާރު ވަނީ މެންޗެސްޓަރ ޔުނައިޓެޑް އާއި ގުޅެން ނިންމާފައެވެ. އެހެންކަމުން ނިއުކާސަލް އިން މިހާރު އަމާޒުހިފާފައިވަނީ ޗެލްސީގެ މިދިޔަ ސީޒަނުގެ މައި ސްޓްރައިކަރުގެ ސޮއި ހޯދުމަށެވެ. ޗެސްލީއިން މި ސީޒަނުގައި އަލަށް ދެފޯވާޑުން ސޮއިކޮށްފައިވާއިރު، އަންނަ ސީޒަނުގައި ޖެކްސަން އަށް ޓީމުގެ ފުރަތަމަ 11 އިން ފުރުސަތު ލިބުމަކީ ދުރުގައިވާކަމެކެވެ. އެހެންކަމުން ޖެކްސަން ޗެލްސީ ދޫކޮށްލުމަކީ ގާތުގައިވާކަމެކެވެ.

މީގެ ދެއަހަރުކުރިން ވިލަރެއާލް އިން 32 މިލިޔަން ޕައުންޑްއަށް ޗެލްސީއާއި ގުޅުނު ޖެކްސަން ވަނީ ޗެލްސީގެ ޖޯޒީގައި 81 މެޗުން 32 ގޯލުޖަހާފައެވެ.
ލަނޑުޖެހުމަށްފަހު މައިކަލް ޖެކްސަން ސްޓެޕްތައް ބޭނުންކޮށްގެން އުފާ ފާޅުކުރާ ނިކޮލަސް ޖެކްސަން އަކީ މައިކަލް ޖެކްސަންގެ ބޮޑު ފޭނެކެވެ. ޖެކްސަން ގެ މުސްތަޤުބަލާއި މެދު ވަރަށް އަވަހަށް ގޮތެއް ނިންމާނެކަމަށް އޭނާގެ އެޖެންޓް ވަނީ މީގެކުރިން ބުނެފައެވެ.