މައިކަލް ކެރިކްގެ އިރުޝާދުގެ ދަށުން މެންޗެސްޓަރ ޔުނައިޓެޑުން ބަލިނުވެ ދަމަހައްޓަމުން އައި ރެކޯޑް، ބުދަ ދުވަހުގެ ރޭ 10 ކުޅުންތެރިންނާއެކު ކުޅުނު ނިއުކާސަލް ޔުނައިޓެޑް އަތުން 2-1 އިން ބަލިވުމާއެކު ނިމުމަކަށް އަތުވެއްޖެއެވެ. މުޅި ދެވަނަ ހާފު އެއް ކުޅުންތެރިއަކު އިތުރަށް ކުޅުމުގެ ފުރުސަތު ލިބުނު ނަމަވެސް، ޔުނައިޓެޑަށް އެ ފުރުސަތުގެ ބޭނުން ހިފޭގޮތެއް ނުވިއެވެ.

މެޗުގެ ފުރަތަމަ ހާފު ނިމެން ކައިރިވެފައި ވަނިކޮށް ނިއުކާސަލްގެ ޖޭކޮބް ރަމްސޭއަށް ދެވަނަ ރަތް ކާޑާއެކު ދަނޑުން ފޮނުވާލި ނަމަވެސް، އެ ޓީމުން ވަނީ ޕެނަލްޓީއަކުން ލީޑު ނަގާފައެވެ. ބްރޫނޯ ފެނާންޑޭޒް ކުރި ފައުލަކަށް ލިބުނު މި ޕެނަލްޓީ ކާމިޔާބުކޮށްދިނީ އެންތަނީ ގޯޑަން އެވެ. ނަމަވެސް، ފުރަތަމަ ހާފު ނިމުމުގެ ކުރިން ފެނާންޑޭޒް ނަގައިދިން ހިލޭ ޖެހުމަކުން ކަސެމީރޯ ވަނީ ބޮލުން ގޯލެއް ޖަހައި މެޗުގެ ނަތީޖާ ހަމަހަމަކޮށްދީފައެވެ.

Ad by Hajj Corporation

މެޗުގެ ކުރީކޮޅު ނިއުކާސަލްއިން ވަރުގަދަ ކުޅުމެއް ދެއްކިއިރު، ކިއެރަން ޓްރިޕިއާ ފޮނުވާލި ހުރަހެއް ގޯލުގެ ދަނޑީގައި ޖެހުނެވެ. އަދި ޔުނައިޓެޑްގެ ކޯބީ މައިނޫ އާއި މަތެއުސް ކޫންހާ ފޮނުވާލި ހަމަލާތައް ނިއުކާސަލްގެ ކީޕަރު އާރޮން ރަމްސްޑޭލް ދިފާއުކުރިއިރު، ބްރަޔަން އެމްބިއުމޯއަށް ލިބުނު ރަން ފުރުސަތެއްގައި ފޮނުވާލި ބޯޅަ ދިޔައީ ގޯލުގެ މަތިން ބޭރަށެވެ.

ދެވަނަ ހާފުގައި ޔުނައިޓެޑުން މެޗު ޑޮމިނޭޓް ކުރަން މަސައްކަތް ކުރި ނަމަވެސް، ނިއުކާސަލްގެ ކީޕަރު ރަމްސްޑޭލް ވަނީ ލެނީ ޔޯރޯ އާއި ޖޯޝުއާ ޒިރްކްޒީ ފޮނުވާލި ނުރައްކާތެރި ހަމަލާތައް ހުށިޔާރުކަމާއެކު ދިފާއުކޮށްފައެވެ. ޔުނައިޓެޑަށް ލަނޑެއް ނުޖެހި ހުއްޓާ، މެޗުގެ އެންމެ ފަހު މިނެޓުގައި ވިލް އޮސޫލާ ވަނީ ހިތްގައިމު ގޯލެއް ޖަހައި ނިއުކާސަލްއަށް ތިން ޕޮއިންޓް ކަށަވަރުކޮށްދީފައެވެ.

މި މެޗުގައި ޔުނައިޓެޑްގެ ބައެއް މުހިންމު ކުޅުންތެރިންގެ ފަރާތުން ފެނުނު ދަށް ކުޅުމުގެ ސަބަބުން ގިނަ ފާޑުކިޔުންތަކެއް ވަނީ އަމާޒުވެފައެވެ. ޚާއްސަކޮށް ކޯބީ މައިނޫ އާއި ބްރަޔަން އެމްބިއުމޯގެ ފަރާތުން ފެނުނު ކުޅުން ފާހަގަކޮށްލެވެއެވެ. މިއީ މައިކަލް ކެރިކްގެ އިރުޝާދުގެ ދަށުން ޔުނައިޓެޑް ބަލިވި ފުރަތަމަ މެޗެވެ.