މި އޮގަސްޓް މަހުގެ ފުރަތަމަ ހަފްތާގައި ރާއްޖެއަށް ޒިޔާރަތްކުރި ފަތުރުވެރިންގެ އަދަދު އިތުރުވެ، ދުވާލަކަށް އެވްރެޖްކޮށް 6،700 އަށްވުރެ ގިނަ ފަތުރުވެރިން ޒިޔާރަތްކޮށްފިއެވެ.

ޓޫރިޒަމް މިނިސްޓްރީން އާންމުކޮށްފައިވާ ތަފާސްހިސާބުތަކުން ދައްކާގޮތުން ރާއްޖޭގެ ފަތުރުވެރިކަމުގެ މާކެޓްގެ ގަދަ 10ގައި ހިމެނޭ ގައުމުތަކުން މިއަހަރުގެ މިހާތަނަށް 870،000 އަށްވުރެ ގިނަ ފަތުރުވެރިން ވަނީ ޒިޔާރަތްކޮށްފައެވެ.

Ad by Hajj Corporation

އަދި މި އަހަރުގެ ޖަނަވަރީ މަހުން ފެށިގެން އޮގަސްޓް މަހުގެ 5 ވަނަ ދުވަހާ ހަމައަށް ޖުމްލަ 1،328،452 ( އެއްމިލިއަން ތިންލައްކަ އަށާވީސް ހާސް ހަތަރުސަތޭކަ ފަންސާސް ދެ) ފަތުރުވެރިން ރާއްޖެއަށް ޒިޔާރަތްކޮށްފައިވެއެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު 9.2 ޕަސެންޓްގެ ކުރިއެރުމެކެވެ.

ރާއްޖެއަށް އެންމެ ގިނަ ފަތުރުވެރިން ޒިޔާރަތްކުރާ ޤައުމުތަކުގެ ތެރޭގައި އެންމެ ކުރީގައި އޮތީ ޗައިނާ އެވެ. މި އޮގަސްޓްމަހުގެ ފަސް ވަނަ ދުވަހުގެ ނިޔަލަށް، ޗައިނާއިން 197،127 ފަތުރުވެރިން ޒިޔާރަތްކޮށްފައިވާއިރު މިއީ، މާކެޓްގެ 14.8 ޕަސެންޓްއެވެ. ދެވަނައަށް އެންމެ ގިނަ ފަތުރުވެރިން ޒިޔާރަތްކޮށްފައިވަނީ ރަޝިއާއިން ނެވެ. ރަޝިއާއިން 157،088 ފަތުުރުވެރިން އައިސްފައިވާއިރު ތިންވަނައިގައި އޮތް ޔޫކޭއިން ޒިޔާރަތްކުރީ 123،449 ފަތުރުވެރިންނެވެ.

މީގެ އިތުރުން ޖަރުމަނުވިލާތުން 929،80 ފަތުރުވެރިން އައިސްފައިވާ އިރު ފަސްވަނައިގައި އޮތް އިންޑިއާއިން ޒިޔާރަތްކުރީ 767،49 ފަތުރުވެރިންނެވެ.

ފަތުރުވެރިކަމަށް ބޭނުންކުރާ ތަންތަނުގެ ތެރެއިން އެންމެ ބޮޑު ހިއްސާއެއް އަދިވެސް ކުރަނީ ރިޒޯޓުތަކެވެ. މިގޮތުން މުޅި ޖުމްލައިގެ 73.2 ޕަސެންޓް ފަތުރުވެރިން ހޭދަކޮށްފައިވަނީ ރިޒޯޓުތަކުގައެވެ. ހޮޓާތަކުގައި 24.5 ޕަސެންޓް އަދި ގެސްޓްހައުސްތަކުގައި 2.5 ޕަސެންޓް ފަތުރުވެރިން ހޭދަކޮށްފައިވެއެވެ.

މިވަގުތު ރާއްޖޭގައި 163 ރިޒޯޓާއި މެރީނާ، 12 ހޮޓާ، 889 ގެސްޓްހައުސް އަދި 158 ސަފާރީ އުޅަނދު ހިންގަމުންދެއެވެ. މި ހުރިހާ ތަނެއްގައި ޖުމްލަ 64،197 އެނދު ހިމެނެއެވެ. މީގެ ތެރެއިން 68 ޕަސެންޓް އެނދު ހިމެނެނީ ރިޒޯޓުތަކުގައެވެ.